‘Euskal Etxea, plazara’ erakusketa ibiltariak UPV-EHUren Leioako campusean hasi du bere ibilbidea

Abenduaren 4ra arte ikusgai egongo da UPV-EHUko Leioako Campuseko liburutegian ‘Euskararen Etxea, plazara’ erakusketa. «Interpretazio Zentro berriaren edukien lagin» gisa aurkeztuta, herritarrak egoitzara hurbiltzera gonbidatzeko ere balio nahi du. Leku ezberdinetarik igaroko da erakusketa, euskararekin lotutako tokiko datuak eta ñabardurak emanez.

‘Euskararen Etxea, plazara’ erakusketak UPV/EHUren Bizkaiko Campusean hasi du bere ibilbidea, irailaren 26an ospatzen den Hizkuntzen Europako Egunarekin bat eginez. Liburutegian egongo da ikusgai abenduaren 4ra arte. Ekimenak, halere, izaera ibiltaria du, eta beste hainbat espaziotan ikusi ahal izango da.

Euskararen Interpretazio Zentro berriarena da erakusketa, Bilboko Euskararen Etxean dagoena. Zentro berria 2023ko otsailean inauguratu zen, eta Kirmen Uribe idazleak eta Patxi Baztarrika soziolinguistak osatutako zientzialari taldearen lanaren emaitza da, baita 60 erakunde eta partikular baino gehiagoren parte-hartzearen emaitza ere, lankidetza proiektua Euskararen Interpretazio Zentro berritua baita.

Bizkaiko Foru Aldundiko iturriek azpimarratu dutenez, Euskararen Etxea erakusketaren bidez, Interpretazio Zentro berriaren edukien lagin txiki bat aurkeztu nahi da, baita herritarrak egoitzara hurbiltzera gonbidatu ere, bisitaldi «esperimental eta ludiko» batetik hasita, bisitariak euskararen izaera poliedrikoan murgildu daitezen.

Helburua da euskara, antzinako hizkuntza izateaz gain, «gazte hizkuntza dela, liluragarria eta eraikitzen ari dena, baita munduko hizkuntza aniztasunaren parte ere».

Askotariko edukiak

Horretarako, erakusketak askotariko edukiak biltzen ditu, besteak beste, euskararen eguneroko egoeraz ohartarazten duten datuak, euskararen historia «josi» duten pertsonaiak eta gertaerak, euskararen etorkizunerako erronkak edo euskal kulturaren aberastasuna eta kalitatea islatzen duten edukiak.

Erakusketaren ibilbidean, leku bakoitzaren ezaugarriak eta datuak erakutsiko ditu ekimenak, udalerriekin edo erakundeekin lankidetzan arituko baitira haien ezaugarriak eta ñabardurak erakusteko.

Izan ere, une honetan UPV-EHUko euskarari buruz emandako hainbat datu biltzen ditu, eta Leioako Campusean dagoen gunean euskarak hezkuntza komunitatea nola bizi duen erakutsiko du. Gainera, bisitariek euren testigantzak utzi ahal izango dituzte, bisitariek euskararekin duten harremana aztertu nahi duen hari joko baten bidez, baita galdera irekien bidez ere.

Azkenik, Gaitu adimen artifizialari euskara irakasteko proiektuari lekua egin dio erakusketak. Gasteizko eta Iruñeko gobernuek eta Euskararen Erakunde Publikoak bultzatutako proiektua da, 2023an ‘Common Voice’ proiektuaren barruan sortua.