Abian jarri dute Araban 2024ko Bideo-kopla Lehiaketa, herrialdeko 14 urte arteko gaztetxoei zuzenduta

‘Zer dago ikusteko zure inguruan?’ galdera bota du Bideo-kopla Lehiaketak Arabako 14 urte arteko gaztetxoei zuzenduta, eta edizio berri baten izen-ematea zabaldu du. Gaiari buruzko hiru eta sei kopla artean osatu beharko dituzte taldean, bideoz grabatu eta antolatzaileei bidali.

Arabako Bertsozale Elkarteak eta ‘Alea’ hedabideak elkarlanean antolatuta, bertso-kopla bideo lehiaketaren bosgarren edizioa jarri dute martxan Araban.

Herrialde osoko 14 urte arteko gaztetxoei zuzenduta dago deialdia, eta aurreko edizioetan izandako harrera kontuan hartuta, edizio honetan 2.000 ikasletik goraren parte hartzea lortzea espero dute.

Herrialdean euskararen erabilera sustatzea da ekimenaren helburu nagusia, eta adin horretako publikoari zuzenduta egonik, bertsolaritza eta teknologia berriak uztartzen ditu proposamenak, Arabako bertsolari gazteei bideo lehiaketa formatuan «sormena» erakusteko aukera eskainiz.

Antolatzaileek azpimarratu dute erraza dela parte hartzeko dinamika. Hiru eta sei kopla artean osatu beharko ditu talde bakoitzak proposatutako gaia landuta: ‘Zer dago ikusteko zure inguruan?’, eta grabazioa bidali.

Lehiaketak ezarritako baldintzei dagokienez, grabatutako bideoak galdetegiaren bitartez bakarrik bidali ahalko direla azpimarratu dute antolatzaileek, eta zehaztu dute ez direla onartuko «emailez, whatsapp bidez edo beste edozein bidetatik jasotakoak».

Izena emateko epea zabalik dago azaroaren 15era arte, baina zehaztu dute 21.00etan bukatuko dela bideo bidalketa egiteko aukera.

Publikoak aukeratuko du bideo-kopla onenaren saria eta ALEA eta Arabako Bertsozaleen Elkarteko epaimahaiek lan bana aukeratuko dute. Sari banaketa abenduaren 1ean egingo dute, oraindik zehazteke dagoen Gasteizko areto batean. Iragarri dutenez, irabazleen bertsoek izango duten protagonismoaz gain saio musikatua egingo dela herrialdeko bertsolari onenen eskutik.