Gasteizko Florida Gabonetako Merkatuaren irekiera abenduaren 5era aurreratuko da

Abenduaren 5ean zabalduko du Gasteizen Florida parkeko Gabonetako Merkatuak. Tokiko produktuen kontsumoak ekonomia errealerako eta lehen sektorearentzat duten garrantzia nabarmendu du ekimena antolatu duen Aenkomerrek. Azoka girotzeko ekitaldiak izango dira urtarrilaren 6ra arte.

Gasteizko Floridako Gabonetako Merkatuaren hirugarren edizioaren irekiera ostegun honetara, abenduaren 5era, aurreratuko da. Aenkomer Arabako Merkataritza eta Zerbitzuetako Enpresaburuen Federazioak antolatzen du hitzordua Gasteizko Udalarekin, Arabako Foru Aldundiarekin eta Vital Fundazioarekin lankidetzan.

Arabako Merkataritza eta Zerbitzuetako Enpresaburuen Federazioak jarduera osagarrien programa bat antolatu du Gabonetako Merkatuaren inguruan, hala nola produktu bereizgarrien dastatzeak Gasteizen, Aiaraldean, Agurainen eta Arabako Errioxan, eta lehiaketa gastronomiko bat, hainbat elkarte gastronomikotan.

Gabonetako Merkatua abenduaren 5ean (osteguna) inauguratuko da, 17.45ean, Manuel Iradier abesbatzaren emanaldiarekin eta ardo beroaren banaketarekin.

Azoka abenduaren 5etik urtarrilaren 6ra irekiko da, 10.30etik 14.00etara eta 17.00etatik 21.00etara. Ostiral eta larunbatetan, ixteko ordutegia ordu erdi luzatuko da 21.30ak arte.

14 etxola

Guztira, errotazioan erabiliko diren egurrezko 14 etxola izango ditu azokak eta herrialdeko 41 erakusketariren lana hartuko du.  

«Eguberrietatik hain gertu dauden egun hauetan merkataritzak eta tokiko produktuak duten garrantzia ezagutaraztea eta mantentzea ahalbidetuko du» azokak, «Gasteiz bisitatzeko eskaintza komertziala eta erakargarritasuna» osatuz, adierazi du Edurne Parro Aenkomerreko zuzendariak.

Maria Nanclares Sustapen Ekonomiko, Enplegu, Merkataritza eta Turismoko zinegotziak nabarmendu du «Florida Parkea Gasteizko Eguberrien gune nagusia» izango dela. Bertan, Jaiotza Monumentala, izotz-pista, Olentzero eta Mari Domingiren etxea eta Gabonetako Merkatua izango dira, eta Nanclaresen esanetan, gogora ekarriko ditu Europa erdialdeko Gabonetako merkatuak.

Cristina Gonzalez Enplegu, Merkataritza, Turismo eta Foru Administrazioko diputatuak nabarmendu du merkatua «beste pizgarri bat» dela «gasteiztarrak eta egun hauetan bisitatzen gaituztenak hiriaren erdigunera hurbildu daitezen erosketak egitera, bertako merkataritzaz gozatzera eta Gabonak kalean bizitzera».

«Tokiko ekonomia, lehen sektorea eta bertako produktuak bultzatuko dituzten hurbileko elikagaien kontsumo arduratsuaren aldeko apustua», azpimarratu du Vital Fundazioak.

Aenkomerreko Gabonetako Merkatua urtarrilaren 6ra arte egongo da zabalik, eta errotazioan dauden egurrezko 14 etxola izango ditu. Horietan, Gasteizko eta Arabako 41 erakusketari egongo dira guztira.