1932ko martxoaren 26ko gauean, Euskal Herriko mendi tontor askotan suak piztu ziren, hurrengo egunean Bilbon ospatu zen Aberri Eguna iragartzeko. Martxoaren 27an, hainbat komunikabidek azaldu zuten pixkanaka milaka bidaiari zeramatzaten trenak iritsi zirela eta 500 auto baino gehiago heldu zirela Bizkaiko hiriburura. Nafarroatik autobusak eta autoak azken orduan iritsi ziren, “istiluengatik”, “Aberri Eguna” aldizkarian idatzi zutenez. 36 lurrunontzitxo ere hurbildu ziren, jendez gainezka, Bilboko itsasadarrera euskal kostaldeko hainbat lekutatik, elkarretaratzea zela eta. Manifestazioa 10:30ean hasi zen, guardia zibilek, zaldiz eta oinez, eraso-guardiek eta armadako zaldizko indarrek zainduta. Eguerdian amaitu zen Sabino Aranaren jaiotetxean egin zen kontzentrazioa. Europako prentsak elkarretaratze horren berri eman zuen. Donostiako “El Día” eta Erromako “El Tavere” hedabideek 100.000 pertsona baino gehiagok parte hartu zutela idatzi zuten, eta Madrilgo “El Debate”, “Informaciones” eta “ABC” egunkariek 50.000 manifestari izan zirela. Parisko “Le Journal” eta “La Croix” egunkariek milaka manifestari izan zirela zioten. Beheko irudian, besteak beste, Luis Arana Goiri manifestazioaren hasieran, eta goiko irudian, Emakume Abertzale Batzako emakume talde bat manifestazioan.