1

Zer da makilaje hutsa

zer funtsezko mamia

oraindik presente dugu

azken epidemia

lur azalean dardara

eta hipertermia

bizitza itotzen duen

sasi ekonomia

nitasunaren garaian

auzoaren premia

gutxiago gelditzen da

esnatzeko momia.

2

Mugaz gaindiko joerak

uneko setioa

kokalekuen arteko

hitzen sugestioa

kolonizazioaren

glukosa, opioa

hausteko erabakia

da autogestioa

behar dira ausardia

eta digestioa

euskaldun izatearen

talaia propioa

3

Faszismoa lotsagabe

mintzo zaigu Europan

beldurrak mantentzen ditu

burmuin ahalak lotan

Greba feministak daude

Bilbon eta Bogotan

zaintza ezin dugu jarri

letra txikiz kolokan

politika sozialetan

ta ekonomikotan

behingoz islatu daitezen

larruazal orotan.

4

Perspektiba ezberdinak

nahi ditut marrazkian

sare zulo aniztunak

nire iragazkian

zerua ez dago berdin

denontzat arrastian

termitak eroso daude

zumitzezko saskian

gure bueltan asko dago

ta ez dago aski han

zapalduak ere badu

norbait bota azpian.

5

Manosferaren zornezko

haztegi birtualek

X-ren jerifalteek

TikTok-eko kontuek

nahi gaituzte mutu, geldi,

dekorazio, vedette

kuadrilateroa dira

sareak ta internet

hankak gihartsu ditugu

ta eskularruak prest

bidea jorratzen dute

hitza hartzen dutenek.

6

Emakumeen kontrako

terrorismo zekena

eraso bat, erantzun bat

salatzeko sistema

lotsa bandoz aldatu da

zartatu da ordena

zutik segitzen du baina

gaixo dago zezena

isiltasuna da gure

bizipenen gangrena

berau da ahanzturaren

lehenengo abizena

7

Gizonak ta jazarleak

jarri ditugu deman

nahiz ta denak hazi diren

boteretsu sisteman.

Ez diote nahi elkarri

leziorikan eman.

Pertsonak behar ditugu

popa aldean, leman

ta konponbidea izan

behar dute probleman

ezin da aldi berean

arnastu eta edan

8

Idazteke daude hainbat

berri ta lerroburu

elkarrekin egin nahiak

sare forma hartu du

gorputz bakarra daukagu

eta milaka buru

lotu ditugu Lesaka,

Durango ta Ziburu

nor bere esparruetan

lanean dihardugu

eztabaidak eztabaida

iparra argi dugu.