ELA sindikatuak Aurore Martinen atxiloketa gaitzetsi du

Sindikatuaren aburuz, Aurore Martinen atxiloketak «Itun Antiterroristari onartezinezko zilegitasuna ematen dio, hain zuzen espainiar gobernuen errepresiozko politika bideratu duen Ituna, eta une honetan frantziar Gobernu berriak, tamalez, bere egin duena».

ELAk ohar bidez gogorarazi du Aurore Martin Estatu espainolaren eskuetan utzi dutela Estatu frantsesean delitu ez diren ekimen politikoak burutzeagatik. «Arrazoi horregatik duela zenbait urtetik honuntza Estatu frantseseko pentsakera ezberdinetako hainbat ordezkari politiko, sindikal nahiz sozialek errefusatu egin dute Martini euroagindua aplikatu nahi izana», gaineratu du.

Sindikatuaren aburuz, atxiloketa hau Ipar Euskal Herriko instituzionalizazioaren eztabaidari buruzko «bidegabeko erantzuna da».

Aurore Martin berehala aberriratzea eta aske uztea exijitu du ELAk.