Burlatako Udalak Europar Batasuneko ikurra kendu du, honek errefuxiatu eta migranteen aurrean erabiltzen dituen politikak gaitzetsi eta salatuz. Ohar baten bidez Jose Maria Noval alkateak jakinarazi duenez, politika «anker eta hipokrita» dela-eta berriz ere ez jartzea erabaki dute.

Novalek azpimarratu egin du Europatik «duintasuna ukatu egiten zaiela». Horregatik, politika hauekin ados ez daudela argi uzteko asmoz kendu dute ikurra. «Bestela gaizki uler liteke, ados egon edo baita Europar Batasun honetaz harro gaudela pentsa liteke».

Hori dela-eta ikurra Bruselasera bidali dute, migrante eta errefuxiatuei babesa adierazi eta haien kontrako jarreren aurrean desadostasuna islatuz. Gaur Europar Batasunaren eguna ospatzen da.