Bilbon, Iruñean, Gasteiz eta Donostian elkarretaratze bana eginda salatu du Euskal Herriko Mundu Martxak Uztaritzen gertatutako «erailketa matxista».

Iragan asteazkenean, irailak 13, 23 urteko emakume baten gorpua aurkitu zuten Uztaritzen, eskuak eta hankak lotuak zituela. Haurdun zegoen emakumea, eta bere bikotekideak aurkitu zuen gorpua.

Igandean 38 urteko gizonezko bat atxilotu zuten Jendarmeriak, Bokalen, hilketarekin zerikusia duelakoan. Bi egun zeramatzan poliziak haren atzetik eta hilketaren egiletzat jotzen dute polizia iturriek.

Ezohiko agerraldi batean, Baionako prokuradoreak, Samuel Vuelta Simonek, azaldu zuen emakumearen gorpua atzeman zuten tokian aurkitutako «froga biologikoek» nola gorpuari eginiko autopsiak «garrantzitsuak» izan zirela ustezko egilea identifikatzeko.

Vuelta Simonek zehaztu zuenez, lapurretak egiteagatik eta ondareak kaltetzeagatik egona zen atxilotua gizonezkoa, eta hainbat aldiz jaso behar izan du «tratamendu psikiatrikoa». Edonola ere, gaineratu zuen ezerk ez zuela pentsarazten krimen bat burutzeko gai izan zitekeenik.

Autopsiak baieztatu zuen asfixiagatik hil zen emakumea bortxatua izan zela. Sudurra hautsita izateaz gain, hainbat lesio traumatiko zituen gaztearen gorpuak.