«Neskak pilotan? Eta zein dago sukaldean afaria egiten?» edo «Gaur neskek 17.00etan jokatuko dute, gero sukaldera joateko». Halako mezuak irakurri daitezke Azkoitiko Pelotari eguneko mutilen txapelketako Whatsapp taldean. Emakumezko pilotariei egindako irainak direla eta, mutilen txapelketa bertan behera uztea erabaki dute Azkoitiko txapelketako antolatzaileek.

Azkoitiko albisteak biltzen dituen Maxixazen atarian ikusi dugu albistea. Bertan, mutilen txapelketako taldean idatzi diren emakumeen aurkako irainen harira, barkamena eskatzen du antolakuntza taldeak. Era berean, azken urteetan bezala, berdintasuna sustatzeko «lanean irmo jarraituko» duela eman dute aditzera bidalitako oharrean.