Goizeko 06.00etarako, jende gehienak lotan jarraitzen duenean, furgonetek eta kamioiek MercaBilbaoko zamalanetarako kaiak okupatzen dituzte, txikizkako merkatariek ordu gutxi batzuk geroago beren saltokiak irekitzeko behar dituzten produktuak erosten dituzten bitartean.

Bilboko Udaleko Garapen, Merkataritza eta Enpleguko zinegotzi Xabier Ochandianok eta MercaBilbaoko zuzendari nagusia den Aitor Argotek hasi berri den Gabonetako kanpaina honetarako aurreikuspenen berri eman dute gaur goizean, MercaBilbaoko pabiloietan egunik oparoenetako bat izan den honetan.

Ochandianok azaldu duenez, Iberiar Penintsulako iparraldeko elikagai galkorren banaketa zentro handienean lan egiten duten handizkako enpresak «normaltasunez eta erritmo onean» ari dira produktuak saltzen. Zentzu horretan, arrain eta itsaskien sektorean Gabonetarako 3.000 tona inguru merkaturatzea espero dela azpimarratu du, urteko merkaturatzearen %14. Legatza, txitxarroa eta oilarra izaten dira eskaera gehien izaten duten produktuak.

Tokian tokiko merkataritzaren indarra

Goizean goiz, zerua oraindik ilun zegoela, pabiloi honen jarduera frenetikoa hasi da. Agustin Sanchezek, Angulas Ibaialdeko ordezkariak, esan duenez, Gabonetako kanpaina «nahiko ondo» hasi da. Konfinamenduaren ondoren tokian tokiko merkataritza «indar handiagoz» itzuli dela eta hori salmentetan nabaritu dela azpimarratu du.

«Jendea ohituta zegoen saltoki handietan erostera, baina uste dut aurten jendea bizitasun handiagoa ematen ari zaiela saltoki txikiei, badirudi pandemiak kontsumitzeko eran eragina izan duela», azaldu du. Hala ere, ostalaritzaren itxiera nabaritzen ari direla azpimarratu du, bereziki jatetxeena.

Prezioei dagokienez, aurten angula garestiago dagoela esan du, arrantza gutxiago egiten ari direlako. «Produktu gutxiago sartzean garestiago saltzen da», azaldu du.

Gabonetako kanpaina nabaritzen hasi den arren, Sanchezek ziurtatu du Eguberriak amaitzen direnean nabaritzen dutela gehien salmenten igoera. «Benetan angularen zale den jendeak urtarriletik aurrera erosten du», esan du Angulas Ibaialdeko ordezkariak.

Hala ere, Javi Salvarrey, Pescados Iruretako ordezkaria, ez da hain baikorra izan. Aipatu duenaren arabera, prezioak beste urte batzuetan baino garestiago daude eta salmentak «ahul» daude. «Itsasoaren egoera txarra da, eta ez da produktu askorik iristen ari, ea hurrengo asteetan hobetzen den».

Frutak eta barazkiak

Geroxeago, fruta eta barazkien pabiloietako jarduera hasi da, baina giro lasaiagoarekin. Hala ere, MercaBilbaoko zuzendari nagusiak nabarmendu duenez, salmentak beste urte batzuetan baino handiagoak izaten ari dira «hurbileko fruta-dendetan erositako kopuruak gora egin duelako».

Gabonetarako 19.000 tona merkaturatzea espero da, urteko salmenten %8 inguru. Hala ere, Bilcosa fruta-dendako Ruperto Ortizek esan duenez, aurtengo Gabonetako kanpaina ez da beste urte batzuetakoa bezalakoa izaten ari pandemiaren ondorioz; nolanahi ere, onartu du bere sektorea ez dela gehien kolpatuenetakoa izaten ari.

Ostalaritza bihar egongo da bueltan, eta fruta-dendetan ere nabaritu da. Ortizek azaldu duenez, limoien eta limen salmentan asko nozitzen da ostalaritza irekita egotea edo ez. «Ostalaritza itxita egon denean, ia ez ziren saltzen, eta orain irekitzera doanean, berriz saltzen ari dira», azaldu du.

Gabonetako jakiak

Eguberrietan, mahatsak, gaztainak eta ananak dira, besteak beste, salmenta gehien handitzen duten produktuak.

Iñaki Mendibilek, Viuda y Hermanos de N.Rodriguez fruta-dendako kideak, adierazi duenez, fruta salmenta abenduaren 20tik aurrera hasiko da nabaritzen. «Hala ere, mahatsa edo anana bezalako produktu batzuk kenduta, fruta ez da bereziki Eguberrietakoa. Bai igartzen dugu behin Gabonak amaituta jendeak barazki gehiago erosten duela, Gabonetan jan duenari aurre egiteko», esan du barrez.

MercaBilbaoko jarduera nahiko handia izango da egun hauetan. Merkatariak goizero etortzen dira hona haien saltokiak hornitzeko, eta, aldi berean, Gabonetako mahaiak arrainez eta frutaz betetzeko. «Gabonetan sasoiko produkturik ohikoenak kontsumitu ahal izango ditugu, talde txikietan ziurrenik, baina mahai gainean ez zaizkigu elikagaiak faltako», adierazi du Argotek.