Ameriketako Estatu Batuetako Moderna laborategiak Europako Batasuneko eta Kanadako arautzaileei 12 eta 18 urte bitarteko nerabeei covid-19aren aurkako txertoaren erabilera onartzeko eskatu die astelehen honetan.

Agiri batean, Modernak azaldu du eskaera Ameriketako Estatu Batuetan maiatzean egindako ikerketa batean oinarritzen dela. Ikerketa horrek adin talde horrentzat produktua «segurua eta oso eraginkorra dela» erakutsi zuela nabarmendu du konpainia farmazeutikoak.

Orain arte, enpresa estatubatuarraren txertoa 18 urtetik gorakoentzat baino ez da erabiltzen, eta onartuz gero, nerabeekin erabiltzeko baimena jasotzen duen bigarren txertoa izango litzateke, Pfizer-BioNTech-en txertoaren ondoren. Azken hau Estatu Batuetan, Europan eta Kanadan baimenduta dago.

Modernak, bere oharrean, erregulatzaile estatubatuarrei baimena laster eskatuko diela iragarri du.

«Animatuta gaude, Modernaren covid-19aren aurkako txertoa oso eraginkorra izan baitzen nerabeen artean infekzioak prebenitzeko», adierazi du Stephane Bancel enpresako kontseilari delegatuak.

Bestalde, enpresak Medison Pharmarekin akordioa iragarri du astelehen honetan, txertoa erdialdeko eta ekialdeko Europan eta Israelen merkaturatzeko.

Bi enpresek 20 merkatutan parte hartuko dute, besteak beste, Polonian, Txekiar Errepublikan, Errumanian, Hungarian, Baltikoetako hiru herrialdeetan eta Balkanetako zati batean, ohar batean azaldu dutenez.