Salhaketak astelehen honetan salatu duenez, Zaballako espetxean dauden mintzategiak duela asteak hondatu ziren. Elkarteak dioenez, arazoak kartzela horretan preso dauden pertsonen egoeran «eragin handiak» ditu, izan ere presoen komunikazioak saihesten ditu senideekin eta abokatuekin.

«Eta badirudi zentroaren Zuzendaritzari axola zaiola, ez duelako ezer egin mintzategiak konpontzeko», adierazi du Salhaketak komunikabideei bidalitako ohar labur batean. Bertan, Araban dagoen kartzelan bizi den egoera salatzeko ekimen berri bat iragarri du ere.

Presoen eskubideak aldarrikatzen dituen elkarteak eta APEL ekimenak (Apoyo Presxs En Lucha) dei-kanpaina martxan jarriko dute. Hala, espetxera deituko dute, bai espetxearen telefono zenbakira (945 318 600) bai Komunikazio Bulegoaren zenbakira (945 318 611).

«Deietan mintzategiak zergatik ez diren konpondu galdetuko dugu, behingoz konpontzeko eskatuko diegu eta gure babesa helaraziko diegu preso dauden pertsonei», azpimarratu dute elkarteek.

Gogoratu dutenez, deiak egiteko ordutegia 9.00etatik 14.00ak arte izango da. Mintzategiak konpontzen dituzten arte eta komunikazioak berriro martxan jartzen dituzten arte iraungo du kanpaina honek.