Gizarte bazterketaren aurkako eta eskubide sozialen aldeko Berri Otxoak plataformak eta Barakaldoko Argitan Emakumearen Aholku Zentroak etxebizitza duinak eskatu dituzte asteazken honetan, astelehenean alokairuko etxebizitzen udal zozketa gauzatu eta gero.

Bi elkarteek azaldu dutenez, zozketaren arrazoia herrian alokairuko etxebizitzen parke publiko bat nahikoa ez izatea da. Hori dela eta, ostegun honetan Barakaldoko udaletxearen aurrean mobilizatu dira bingo-joko batzuekin. Hala, «udalerrian etxebizitza duin bat izateko eskubidea ez dela bermatzen» eta eskubide hori «modu lizunean zozketatzen» dela salatu dute.

Gogoratu dutenez, egungo araudiak etxebizitza bat zuzenean esleitzera behartzen du etxegabetze bat gertatzen denean, etxegabetzeak eragindako adingabeak daudenean edo indarkeria matxistaren biktimak direla egiaztatzen duten emakumeak daudenean. Gaurko elkarretaratzean Berri Otxoak eta Argitan taldeek azpimarratu dute legediak berak «etxebizitza duina izateko eskubidea aitortzen duela; ez, ordea, zozketa».

«Sistematikoki urratzen dira utzarazpen batek kaltetutako pertsonak edo indarkeria matxistaren biktima diren eta etxebizitza bat eskuratzeko baliabiderik ez duten emakumeak babesten dituzten legeak eta eskubideak», salatu dute.