Tubacexeko grebalariek prentsaurrekoa eskaini dute ostegun honetan enpresak Laudion duen lantegiaren aurrean bere borroka berresteko eta erresistentzia Kutxak duen garrantzia nabarmentzeko. Aiaraldeko ostalariak, merkatariak, gazteak, ikasleak, pentsiodunak eta langileak bertan izan dira grebalariei babesa emanez.

150 langileen kaleratzea zekarren enplegua erregulatzeko espedienteri (ERE) erantzuteko greba hasi zenetik 176 egun bete direla gogorarazi dute gaur langileek. Uztailaren hasieran, EAEko Justizia Auzitegi Nagusiaren epai batek baliogabetzat jo zuen EREa, baina enpresako zuzendaritzak helegitea aurkeztu zuen espainiar Auzitegi Gorenean.

Helegiteari uko egiteko eskatu diote grebalariek zuzendaritzari, eta 176 eguneko grebaren «gogortasuna» gogoratu dute. «176 egun hauetan zalantzak izan ditugu, sufritu egin dugu eta min ematen digu gure enpresa geldirik eta galerak izaten ikusteak, gure sektoreko gainerako enpresak diru kopuru handiak irabazten ari diren une honetan».

Era berean, greba osoan zehar zuzendaritzak izan duen jarrera salatu dute, baita Ertzaintzaren errepresioa, zailtasun ekonomikoak, komunikabide batzuen jarrera eta erakunde publikoen ahanztura ere. Halaber, salatu dute zuzendaritza ez dela EAEko Auzitegi Nagusiaren epaia betetzen ari eta langileek oraindik ez dutela soldata jaso, enpresak promes egin zuen bezala.

Erresistentzia Kutxa

Hori dela-eta, jendeari «ahal duten neurrian» bere borroka babestea eskatu diote, erresistentzia Kutxari dohaintzak eginez, ES31 3008 0214 16 4417535921 banku-kontuaren bitartez.

«Gure borroka azpikontratazioa eta gure enpleguen prekarizazioa eragozteko da, gure enpresaren eta bailararen biziraupena eta etorkizuna bermatzeko, bai eta kaleratutako 128 lankideak behin betiko eta bermeekin berronartzeko ere; gure ustez, borroka justua da, eta ez du merezi erakunde batzuetatik jasaten ari garen kriminalizazioa», azpimarratu dute grebalariek.

«Borroka areagotzea»

Tubecexeko langileekin batera, Aiaraldeko ostalariak, merkatariak, gazteak, hezkuntza komunitatea, pentsiodunak eta langileak elkartu dira.

Grebalarien aurkako «mehatxuak, eguneroko poliziaren jarrera, baita manipulazio mediatikoak eta prozesu judizialak behingoz eteteko» eskatu dute. «Honek guztiak orain arte lortu duen gauza bakarra gatazka sakontzea eta langileentzako irtenbide justu eta duinetik aldentzea izan baita. Langileak ez gara kriminalak, eta ez gaituzue horrela tratatu behar», adierazi dute.

Lakuako Gobernuari EAEko Auzitegi Nagusiaren epaia betearaz dezala eskatu diote, eta «eskualdearen etorkizunarekin inplika dadila». Barne Sailari «giroa tenkatzeari utz diezaiola eta ez dezala beharrezkoa ez den presentzia polizialik bidali» eskatu diote.

«Borroka hau ez da Tubacexen aldeko borroka bat bakarrik, guztiontzako etorkizun eta enplegu duin baten alde ari dira borrokan, eta, bide horretan, esan nahi dizuegu auzokide asko dituzuela ondoan laguntzeko: laguntza ekonomikotik hasi, baina baita seme-alabak zaindu edota beharrezkoak diren bestelako lanetan sostengatzeko ere. Borroka hau kolektiboa da, eta beste behin ere modu honetan egingo diogu aurre, kolektiboki», nabarmendu dute.

Bukatzeko, dei dei egin dute «orain inoiz baino gehiago» babes ekonomiko eta soziala «areagotzeko». Izan ere, datozen asteak «garrantzi berezia» izan dezaketela gogoratu dute.