LAB sindikatuak jakitera eman duenez, Bilboko Lan arloko 5. Epaitegiak amiantoaren ondorioz sortutako gaixotasun baten eraginez hil zen merkataritza-ontzi bateko mekanikari baten oinordekoei 81.000 euro ordaintzera zigortu du Naftomar itsas-enpresa.

Sindikatuak ohar baten bitartez azaldu duenez, mekanikariak nazioarteko hainbat enpresa eta ontzi ustiatzailetan egin zuen lan, baina «egiaztatuta geratu da» joan den mendeko 60ko hamarkadatik aurrera eraikitako ontzi guztietan amianto kopuru handia zegoela; hala, «mekanikari gisa, lan mekanikoak, eskuzkoak, soldadura elektrikokoak edo autogenokoak etab. egiten zituen, eta amiantoarekin berotutako hodietan mantentze lanak egiten zituen».

«Gainera, konponketak egiteko, amiantoa estaltzen zuen geruza metalikoa kentzen zuten eta, ondoren, isolatzaile geruza hori (amiantoa), hondatu egiten zena. Amianto zati horiek berriro erabiltzen zituzten hodien gainean jartzeko eta, horretarako, urez bustitzen zituzten. Hodi, galdara eta ponpen gainean jarduten zuen. (…) Galdaretara konponketak egitera sartzeko, amiantozko jantzia erabiltzen zuen, gorputzean bakarrik, ez buruan. (…) Soldatzeko, kareta eta mantala erabiltzen zituen, baina ez maskara. (…) Amiantoarekin kontaktua izatea ohikoa zen», azaldu du sindikatu abertzaleak.

Epaia modu «positiboan» baloratu du LABek eta itsas merkataritzaren esparruan epai aitzindaria dela nabarmendu du.

«Hau tanta berri bat da ozeano honetan, non amiantoaren biktimek banaka borrokatzen jarraitu behar duten», adierazi du. Horregatik, eskatu diete botere publikoei neurriak har ditzatela amiantoaren biktimak aitortzeko, kasuak aztertzeko, tratatzeko eta ikertzeko bidea errazteko, bai eta amiantoaren biktimek ordaina jaso dezaten ere.