Akitania Berria Eskualdeko Osasun Agentziak (ARS) atzo, urriaren 24an, plazaratu zituen datuek argiki baieztatu zuten covid-19ak eragindako pandemiak berriro ere hartu duen goranzko joera.

Hala, Pirinio Atlantikoen departamendua aintzat harturik urriaren 24an intzidentzia tasak goia jo zuen, 100.000 biztanleko 81,1 kasu neurtu zirelako. Data horretan 51 herritar ingresatuta ziren koronabirusak jota departamenduko erietxetan.

Urriaren 15 eta 21 arteko asteari egokitutako bilanaren arabera 100.000 biztanleko 49,8 kasu agertu ziren departamenduan.

Izan ere, Ipar Euskal Herria eta Biarno bere baitan hartzen dituen departamenduaren barne egoera ikusita, hiru euskal lurraldeen eremua da intzidentzia tasa handiena duena. Egun bateko datua izanik ere, eskualdeko bertze departamenduekin ematen den egoerarekin alderatuta intzidentzia askoz altuagoa da Euskal Elkargoak hartzen duen lurraldean. Igandeko datua bereziki kezkagarria izan zen, baina larunbatekoak ere joera berbera markatu zuen (74,9).

[#COVID19 Situation dans les #PyrenéesAtlantiques au 24/10]
Taux d'incidence dans chaque intercommunalité des Pyrénées-Atlantiques [64] pic.twitter.com/WR1M6aninH

— COVID — 19 - Nouvelle-Aquitaine (@NA_Covid19) October 24, 2021

«Neguko aroa hurbiltzen delarik birusa azkarki zabaltzeari ekin dio, eta horrendako prebentzio neurriak errespetatzea ezinbestekoa dela oroitarazteko beharrean gaude», adierazi zuen ARSk joan zen ostiralean plazaraturiko oharraren bidez.

Ohar horretan gripea, bronkiolitis eta gastroenteritis gaitzen kasuak emendatu diren testuinguruan covid-19ari aurre egiteko neurriak errespetatzeko premia nabarmendu zuen osasun agentziak. Era berean, txertaketa osatzeko gomendioa berretsi zuen.

Gripearen aurkako txertoarekin batera

Hala, 65 urte baino gehiago dituzten pertsonek «birusaren aurrean benetako babesa izateko» txertoaren hirugarren dosia behar dutela hartu oroitarazi dute osasun arduradunek.

Hego Euskal Herrian indarrean eman den protokolo berbera aurreikusi dute Ipar Euskal Herrian ere. Gauzak horrela, gripea eta covid-19aren aurkako txertoak biak ala biak une berean ahalko dituzte hartu zaurgarri diren herritarrek.

Oroitzapen dosi hori Pfizer txertoarekin baizik ez dela egingo azaldu du ARSk.

«65 urte baino gehiago dituzten herritarrentzat gripearen txertoa eta covid-19aren aurkako txertoaren hirugarren dosia hartzeak sekulako garrantzia du bi gaitzen bilakaerarik larrienak saihesteko eta, ondorioz, erietxean amaitzeko arriskuak apaltzeko», gehitu du.

Bigarren intzidentzia tasarik altuena txertaketa maila handia izan arren

Urriaren 11 eta 17 arteko asteak utzitako datuak xehatuta, ondorioztatu daiteke makroeskualde horren barne diren 12 departamenduetatik Pirinio Atlantikoena dela bigarren intzidentzia tasarik handiena duena.

Aurreko neurketarekin alderatuta hogei puntu gora egin zuen intzidentzia tasak. Aipaturiko epean 100.000 biztanleko 57,8 kasu neurtu ziren Ipar Euskal Herria barne den departamenduan.

Izan ere, asteburuan zabaldu ziren zifrak aintzat harturik hurrengo neurketa langa horretatik goiti kokatuko dela aurreikusi daiteke. 

Nabarmentzekoa da kasuen hazkundea gertatu dela txertaketa mailarik altuenetarikoa duen departamenduan. Charente-Maritime departamenduaren atzetik Ipar Euskal Herria barne duen departamendua baita txertaketa mailarik altuena duen eskualde mailako eremu administratiboa.

Orotara populazioaren %83,2k txertoaren bi dosiak hartu ditu Pirinio Atlantikoetan eta %84,1k dosi bat bederen hartu du, ARSk plazaraturiko txostenaren arabera.

Adinaren arabera, 12-17 urtekoen artean %85,3ak txertaketa egina zuen urriaren 19an Ipar Euskal Herria eta Biarno elkartzen dituen departamenduan. 18-39 adinekoen artean %93,6ak dosi bi hartuak zituen; 40-49 artean %91,3k; 50 urtetik aurrera batezbestekoa %95koa da.

Osasun langileen kasuan, zahar egoitzetan eta egonaldi luzeak egiten dituzten pazientzeak artatzen dituzten zentroetan jarduten duten langileen artean %91,4k txertaketa osatu du. Osasun langile liberalen kasuan %95,8k covid-19aren aurkako txertoaren dosi biak hartuak ditu.

Gogorazi behar da osasun arloko langileentzat derrigorrezko txertaketa agindu zuela frantziar Gobernuak.