Astearte honetatik aurrera, Zubietan dagoen Gipuzkoako erraustegiko plantillako langileek greba mugagabea egingo dute, lantokian pairatzen duten prekarietatea ezabatzeko.

ELA sindikatuak ohar batean azaldu duenez, Ekobal Operación y Mantenimiento S.L. azpikontratak kudeatzen duen enpresak hasieratik ez ditu bermatu osasun eta lan baldintzak.

Hala, ELAk salatu du laneko segurtasun eta osasun arloko neurririk eza «etengabea» dela lantegiaren jarduera hasi zenetik. Gainera, lan arriskuen ebaluazioa desegokia da sindikatuaren esanetan, eta ez dator bat Zubietako lantokiaren errealitatearekin.

Halaber, lanaldiak, kasu askotan, etenik gabeko txandako 12 ordura arte luzatzen direla salatu du, eta, aldi berean, baimendutako legezko gehienekoaren gainetik aparteko orduak egiteko betebeharra ezartzen dela.

Sindikatuak gaineratu duenez, egutegiak egun batetik bestera aldatzen dira, «lanaldien arteko atsedenaldiak eta hitzartutako oporrak errespetatu gabe». Errealitate horrek ezinezko egiten du sindikatuaren arabera «lana eta bizitza bateragarri egitea».

Hala, azpimarratu du, aplikatzekoa den hitzarmena bide garbiketako sektorearena dela, eta jarduera gehiago biltzen dituen arren, ez diola erantzuten Zubietako zentroko lan errealitateari. Ildo horretan, ELAk lantegiaren errealitate espezifikoa jasoko duen enpresa hitzarmen baten negoziazioa irekitzea eskatu du.

Kaleratze sistematikoak

«Enpresak sistematikoki kaleratzeak egiten ditu inolako justifikaziorik gabe. Jardunbide hori errepikatzen ari da jarduera hasi zenetik, eta azken kaleratzea oso egun gutxitan gertatu da. Langilea berehala berriz hartzea eskatzen dugu», azpimarratu du sindikatuak.

ELAren ustez, Ekobaleko zuzendaritzari eta Gipuzkoako Foru Aldundiari dagokie erantzukizuna, azken horrek aipatutako azpikontratari esleitu ziolako erraustegiaren ustiapena.

«Erraustegian langileek, bai herritarrek, oro har, eskubide horiek bermatuak izan beharko lituzkete», nabarmendu du. 

Era berean, ELA sindikatuak zera salatzen du: Lakuak ezarritako zerbitzu minimoek urratu egiten dutela langileen greba eskubidea. Izan ere, ekoizpen arloan %70eko zerbitzu minimoak ezarri dira, eta balorizazio plantan, berriz, %90ekoak.