Atxuriko kantxen gaueko itxieraren gaia eta bertan lo egiten zutenei etxebizitza alternatibak emateko Udalak egindako kudeaketa ostiral honetan eztabaidatu dute udal batzorde batean. Bertan, EH Bilduren taldeak eskatuta, Amaia Arregi Herritarren Segurtasunerako Saileko zinegotziak eta Juan Ibarretxe Gizarte Ekintzako zinegotziak agerraldia egin dute.

Urtarrilaren 3an, Angelica hil eta hurrengo egunean, jarri zituen Bilboko Udalak hesiak, bertan lo egiten zuten pertsonei sarrera eragozteko. Azken asteotan, hainbat elkarte mobilizatu dira neurri horren aurka. Azken protesta atzo egin zuen Ongi Etorri Errefuxiatuak elkarteak.

Arregik adierazi du kantxak itxi egin direla, Atxuri eta Ollerieta auzoetako bizikidetza hobetzeko urrian egindako osoko bilkuran hartutako erabakiarekin bat etorriz. Ondoren, Udaleko batzorde tekniko batean kantxa horiek eta inguruan dagoen igogailua gauez ixtearen aldeko iritzia agertu zela adierazi du. Batzorde horretan auzoetako hainbat elkarte parte hartu zutela baieztatu du.

Ibarretxek, bere aldetik, adierazi du kantxetan lo egiten zuten pertsonei Bilboko Udalak dituen etxerik gabeko pertsonentzako gaueko harrera-baliabideetako batean lo egiteko aukera eskaini zitzaiela. 16 pertsonetatik seik edo lauk aukera hori errefusatu zutela eta inguruko parke batera lo egitera joan zirela ziurtatu du.

EH Bildu: «Ez da irtenbidea»

Alba Fatuartek, EH Bildu Bilboko zinegotziak, Udal gobernuak urritik hartutako «erabaki politiko» bat dela adierazi du. Zalantzan jarri du Arregik aipatutako batzordeak hartutako erabakia, eta galdetu du ea zergatik ez ziren bilera horretara deitu Atxuriko Harrera Sarea, Ongi Etorri Errefuxiatuak, Atxurigorri, SOS Arrazakeria edo Atxuriko eskolako IGEak. «Agian, kontuak ateratzen ez zitzaizkizuelako?», galdetu du.

Bestalde, Atxurin lo egiten zuten etxerik gabeko pertsonak «bizikidetzaren ustezko porrotarekin eta auzoaren degradazioarekin lotzeko asmo manipulatua» egon dela eta ziurtatu du kantxen itxierak «ez diola ezer positiborik ekarri auzoaren egoerari».

«Itxiera ez da irtenbidea, kaleetan lo egiten duten 300 pertsona baino gehiago ez baitira desagertuko, ikusezinagoak eta ahulagoak baino ez dira izango. Egoera horren aurrean, 2015etik baliabide berririk ez dugunean, gobernu-taldeak nahiago du erromesentzako aterpetxe bat ireki, etxerik gabeko pertsonentzako aterpetxe bat baino», adierazi du Fatuartek.

Elkarrekin Podemosek: «Egoera larriagotu egin da»

Elkarrekin Podemosek «premiazko» ostatua eskatu du. Xabi Jiménez zinegotziaren hitzetan, «irtenbidea pertsona horientzako bizitoki alternatiba bat sortzea da, eta ibilbide soziolaboral eta hezitzaile bat, ikasketa batzuk osatzeko eta enplegua bilatzeko aukera emango diena». «Gure ustez, irtenbidea ez da ia 30.000 euro gastatzea kantxak ixten», gaineratu du.

Jimenezek Bilboko 2022rako aurrekontuetan larrialdiko ostatu-programaren aurrekontua %6,5 murriztu dela salatu du, 3.093.699 eurotik 2.891.579ra: «Horren aurrean, ordea, Bilbon irekiko den aterpetxe bakarra erromesena izango da, 2,6 milioi euroko aurrekontuarekin».

Izan ere, Elkarrekin Podemosen ustez, udalaren jardunak «agerian» utzi du bizitoki-alternatibarik ez dagoela Bilbon, «eta arazo hori larriagotu egin da azken urteotan, eta, gainera, joera aldatu egin da profilean». Jimenezek azaldu duenez, «Bilbon kalean dauden pertsonen %60 gazte migratzaileak dira, eta Bilbon bizitza-proiektu autonomo bat garatzeko aukera bakarra bilatzen dute».