Bilboko Konpartsak irailean hasi ziren aurtengo Aratusteak, Txosnaganerako mendi-martxa, San Juan gaua eta beste hainbat ekitaldi prestatzen, azken urteotan lagun izan duten hainbat eragilerekin batera. Dagoeneko, egingarri ikusten dituzte plangintzatutako ekimenak.

Ostiral goiz honetan, Nerea Matutek eta Ioritz Varonak ezagutzera eman dute kanpaina berria. Konpartsen ordezkariek agerraldia egin dute Bilboko Hika ateneoan; bertan azaldu dute elkarlana ere nagusitzeko asmoa dutela eta prestatzen ari diren ‘Nagusia* egingo dugu!’ kanpainako ekintzetan parte hartzera gonbidatu eta animatzen dituztela bilbotar guztiak. Ohi bezala, konpartsak elkar-zaintzaren filosofian oinarritu dira, eta beraz, egitarau denek osasun-neurriak errespetatu eta segurtasun kolektiboa bermatuko dutela ziurtatu dute.

Aratusteak

Hala, hamabost egun barru abiatuko dute Bilboko jai-urtea, Aratusteetako X. Kopla Txikien Lehiaketarekin. Aratusteek, jakina denez, martxoaren 1era arte iraungo dute. Matutek eta Varonak ez dute zehaztu zein izango den Aratusteen programazioa, «hori Jai Batzorde Mistoari dagokio eta; ez gara gu spoilerrik egingo dugunik».

Argibide gehiago eman dituzte konpartsek hurrengo erronken gainean: esaterako Korrikarekin bat egingo dute, euskararen lasterketak apirilaren 6an zeharkatuko du Bilbo, eta egun horretan ere gure hizkuntza nagusia egiteko lana eta kilometroak egingo dituzte konpartsakideek, HitzEkin goiburuari eta lekukoari helduta.

Ekainean, ordea, kirola eta bizimodu osasuntsuak nagusituko dituzte, Bolintxu defendatzeko aldarriarekin batera. Hilaren 11n, Txosnaganerako mendi-ibilbide neurtua antolatuko dute konpartsakideek mendizale eta naturazaleekin batera egunaz gozatzeko. Klasiko bilakatu den ekimen horri lekukoa hartuko dio beste klasiko batek, San Juan bezperan ospatuko duten udako solstizioaren gaua. Euskal usadiok ere nagusi egingo dituzte.

Aste Nagusia

Modu berean, uztailaren 16ko Konpartsakide Eguna antolatu ostean, «Bilbo osoak eta unibertso erdiak itxaroten dabiltzan Aste Nagusia, urteko ospakizunik nagusiena», ere «benetan nagusia» egingo dutela ziurtatu dute konpartsek.

Hala, azaldu dutenez, horretan dabiltza lanean Bilboko Jai Batzorde Mistoaren barruan, bilbotar ugarik eta makina bat eragilek lagunduta, «ahalik eta egitaraurik osoena eta aldiz seguruena osatzeko». Gordetzeko datak izango dira abuztuaren 20a eta 28a bitartekoak.

Oro har, konpartsen arabera «Egutegi oparoa izango da datozen hilabeteotakoa, eta gure asmo sendoa da aurtengoa handia, itzela, benetan Nagusia izan dadin, bilbotarrek behar eta merezi duten moduan». Jaiurte honetako ekintza guztiak #NGS22 traolarekin jantziko dituzte konpartsek.

Azkenik, Nerea Matutek eta Ioritz Varonak nabarmendu dute jaien alde auzoetan egiten den lana: «jai-urte honen oinarrian badira Bilboaldeko herrietako eta auzoetako jaiak, atzean daukaten jai-batzordeen izugarrizko lan pareagabea, eta gutxitan eskertua». Azaldu dutenez, jai-batzorde bakoitzak eta Auzotarrok federazioari dagokio horren inguruko informazioa ematea.