Shell petrolio-konpainia britainiarrak astearte honetan ohar baten bidez iragarri duenez, pixkanaka gasa eta petrolioa Errusian erosteari utziko dio, ez ditu epe luzeko kontratuak luzatuko, bere jabetzako gasolindegiak itxiko ditu, eta hegazkinetarako erregaien zein lubrikazio operazioak etengo ditu Errusian.

Era berean, konpainiako kontseilari delegatua den Ben Van Beurdenek barkamena eskatu du, enpresaren izenean, Ukrainaren inbasioaren ostean hidrokarburoak Moskuri erosten jarraitu izanagatik: «Kontziente gara joan den astean, gasolina eta gasolioa bezalako produktuetan findutzeko xedez, errusiar petrolio gordin karga bat erosi izana, nahiz eta hornigaien segurtasuna gure pentsamenduen lehen lerroan egon, ez zela egokia izan eta sentitzen dugu».

Ildo horretatik, Shellek aurreratu du «Errusiako hidrokarburo guztietan» duen inplikazioetatik pixkanaka «erretiratzeko» asmoa duela, gasetik eta gas natural likidotutik eratorritako produktuetatik barne eta, aldi berean, iragan den astean erositako errusiar kargamendutik eratorritako irabaziak «biktima ukrainarrentzako laguntza funts» batera bideratuko dituela adierazi du.

«Orain arte, gure ekintza guztiak, energia hornidurak mantentzen diren bitartean, gizartea energia fluxu errusiarretatik askatzeko beharrari buruz Gobernuekin izandako etengabeko eztabaidetan oinarritu dira. Europarako oliobideen fluxuak geldiarazteko egungo mehatxuek are argiago uzten dituzte hartu beharreko erabaki zailak eta horiek hartzen saiatzean pairatu ditzakegun ondorioak», azaldu du Shellek.

Van Beurdenek sektorearen erronka nagusia Gobernu errusiarrari Ukrainan egiten ari den «gehiegikeriengatik» presio egitearen eta Europarentzat energia hornidura egonkor eta segurua mantentzearen arteko «dilema» dela azaldu du. Hala ere, Shelleko kontseilari delegatuak ebatzi du Gobernuen erantzukizuna izango dela Ukrainako gerrak irauten duen bitartean hartu beharreko «sakrifizio zinez zailen» inguruan erabakitzea.

Shellek Euronext merkatuan dituen akzioek beheranzko kotizazioa izan dute astearte honetan, eta %0,5 jaitsi dira, 23,8 euroraino.

Uko Nord Stream-2ri

Joan den otsailaren 28an Shellek aurreratu zuen Gazprom erraldoi errusiarrarekin dituen proiektu bateratu guztiak bertan behera utziko dituela, Sajalin-II gas natural likidotuaren instalazioan duen %27,5ari uko egingo diola, baita Siberiako Salym eta Gydan petrolio-proiektuetan duen %50ari ere.

Hori horrela, Nord Stream 2 gasbide errusiar-alemaniarrean duen partaidetza amaitutzat emango du.