Urriaren 8an Sarek amaitutzat emango du duela bi urte ezarri zuen erronka: 3.127.326 km egitea, Euskal Herrian dauden biztanle adina kilometro «bizikidetzaren, bakearen eta euskal presoen etxera itzultzeko prozesuaren alde». Eta musika jaialdi baten bidez eginen du.

Gaur 15 herri ezberdinetan bildu dira kilometroak batzen jarraitzeko, ‘Etxera bidea gertu!’ lelopean. Aduna, Amasa-Villabona, Andoain, Asteasu, Lasarte-Oria, Usurbil, Zizurkil, Orio eta Zarautzetik abiatu dira talde ezberdinak Orion bertan bazkaldu eta arratsaldeko ekitaldietan parte-hartzeko. Anoeta, Ibarra, Lizartza-Txarama eta Alegiatik ere egin dituzte kilometroak, Tolosan bat eginez. Aretxabaletan ere jarri dute bere alea.

Bi urte hauetan Izan Bidea aplikazioan banaka edo taldeka egindako urratsak erregistratu dituzten herritarren ekarpenak eskertu ditu Sarek eta urrira bitarte «urratsak ematen jarraitzera» animatu dute gizartea.

«Izan ere, erronka honen bitartez, euskal presoei ezarritako salbuespeneko espetxe politika bertan behera uzteko herri honek duen nahia mugimenduaren bitartez, aktibazioaren bitartez, kilometroak eginez, adierazi nahi izan dugu», gaineratu du.

Zentzu horretan, nabarmendu egin du «azken bi urteetan, espetxe politikaren baitan aldaketa garrantzitsuak» eman direla. «40 urte luzez ezarritako urruntze politikarekin amaitzen hasiak gara eta isolamendua eta lehen gradua iraganean geratu dira. Lorpen hauek urte guzti hauetan egindako lanaren eta kalean bildutako herritarren bultzadaren fruitua dira, eta horregatik, eskerrak eman eta bide honetan urratsak ematen jarraitzeko eskatu nahi dizuegu».

Hala ere, oraindik «bide luzea» dagoela ere ez dute ahaztu. «85 dira oraindik Euskal Herritik kanpo dauden euskal presoak, hirugarren gradua eta baimenak eskuratzeko bidea oztopoz josia dago eta gaur gaurkoz gutxi dira progresio hori eskuratzea lortu duten presoak, oraindik 19 larriki gaixo diren preso daude espetxean eta gurasotasunak espetxean zailtasunez beteriko aukera izaten jarraitzen du».

Honela «gainditu beharreko trabak» oraindik «asko» direla nabarmendu du Sarek. «Baina bidea hasia dugu, arrakalak zabalik dira hormetan, eta etxeratze prozesua inoiz baino egingarriagoa da, orain arte moduan lanean eta urratsak ematen jarraitzen badugu».

«Kalean gaude, aktibo, mugimenduan, ezberdinen artean akordioak eginez, esperientzia eta bizipen kontrajarriak izan ditugunon artean hitz eginez, batuz, enpatia ariketa sendoak garatuz... elkarbizitzarako eta bakera bidea egiten ari gara, salbuespen neurriak salatuz eta legedi arrunta exijituz, euskal presoei dagokien etxerako bidea egiteko ateak zabaltzen ari gara», gehitu du Sarek.