Urriaren 23tik 29ra bitartean Biarritzen jokatuko den euskal pilotako munduko txapelketan ere euskal selekzioa ez du ofizialki parte hartzerik izango eta euskal pilotariek, beste behin, frantziar eta espainiar Estatuen bandera eta ereserkiaren izenean lehiatu behar izango dute. Gure herrian jokatuko den txapelketa honen bezperetan «Euskal pilota selekzioaren aldeko manifestua» aurkeztu dute gaur Durangon izandako ekitaldi jendetsuan.

Endika Barrenetxea erremontistak, Laura Saez gomazko paletako pilotariak eta  Ibai Zabala eta Iera Agirre eskuzko pilotariek irakurri duten dokumentuan Nazioarteko Euskal Pilota Federazioak antolatzen dituen nazioarteko txapelketa ofizialetan euskal selekzioarekin parte hartu ezinda jarraitzen dutela gogorarazi dute. «Lehiatzeko aukera bakarra Espainia, Frantzia edo onartuta dagoen beste selekzio baten izenean egitea da, tamalez Biarritzen laster ikusiko dugun modura. Gure herrian, gurea dugun eta gure izena daraman kirolean hau gertatzea, lotsagarria eta penagarria dela deritzogu».

Era berean, euskal pilotariak direnez, «Euskal Herriko koloreekin eta gure ereserkiaren
doinupean lehiatzea nahi dugu. Beraz, Euskal Herriko selekzioak bere izena
daraman kirolean nazioarteko txapelketak jokatzeko izan beharko lukeen
eskubidean oinarrituta, euskal selekzioaren ofizialtasuna aldarrikatzen dugu, eta
hori lortzeko denok batu behar ditugu indarrak».

Hori dela eta, lau eskaera zehatz egin dizkiete Durangoko Ezkurdi plazan bildutakoek Euskal Herriko erakunde eta eragileei. Munduko Pilota Batzarrari eta Euskal Pilota Federazioei esaterako, egoera honi irtenbide bat aurkitzeko lanean jarrai dezatela eskatu diete, «eta har ditzatela helburua lortzeko bidean, hartu behar diren erabakiak; besteak beste, Nazioarteko Euskal Pilota Federazioan euskal pilota selekzioa ofizial izateko eskaera berriz egitea».

Euskal Herriko erakundeei eskatu diete «jarrai dezatela beraien esku dauden tresna juridiko,
politiko eta pertsonalak helburu honetara bideratzen, euskal pilota selekzioak
nazioartean ofizialtasuna lortzeko behar duen laguntza eskaintzeko».

Bestalde, kontuan izanda nazioartean ofizialtasuna lortzeko arazoa «juridikoa baino politikoa dela, dei egiten diegu Euskal Herriko alderdi politikoei, eta batik bat aldarrikapenarekin bat egiten dutenei, euskal gizartearen gehiengo handi baten ametsa errealitate bihurtzeko urratsak ematen jarrai dezatela».

Eta amaitzeko euskal pilota munduari, «euskal pilota selekzioaren ofizialtasuna lortu ahal izateko beharrezkoa den babesa eskaintzea eskatzen diogu».

Ekitaldi jendetsua

«Mundiala bai, Euskal Herria ere bai! Inposaketarik ez! Ofizialtasuna!» zioen pankartaren atzean, Euskal Herriko klub desberdinetako ordezkariez gain, pilota munduko aurpegi ezagun asko batu dira. Esaterako Durangon izan dira Euskadiko Euskal Pilota Federakuntzako lehendakaria, Gotzon Enbil, baita postu hau bete izan dute Patxi Jauregi eta Kiko Caballero, Araba, Bizkaia eta Gipuzkoako federazioetako lehendakari Ikere Gereta, Enaitz Olaetxea eta Itziar Lete, Jean Michel Garayar, Iparraldeko Pilota Batzordeko lehendakaria, Martin Ibarra, Euskal Pilota Konfederazioko (EHPK) lehendakari ohia, Biarritzen frontballean parte hartuko duen Leire Garai pilotaria, Maite Ruiz de Larramendi eta Naroa Agirre eskuzko pilotariak, Beñat Lizaso eta Manuel Quesada pilota egokitutako pilotariak, Iker Amarika pilotari ohi eta Emakume Master Cupeko zuzendaria, Martxel Toledo pilotari ohi ESAITeko kide ohia...

Hauetariko gehienen esanetan, aspaldi ixil xamar zegoen euskal selekzioen aldarriaren sua berriz ere pizteko oso baliagarria izan daitezke gaurkoa bezalako ekitaldiak.