UGT sindikatuak jakitera eman duenez, Bilbo, Bermeo, Lekeitio, Ondarroa, Gernika, Mungia, Ermua, EHU eta Galdakaoko ospitalea lotzen dituen BLBko langileek greba egingo dute 2023ko lehen hiruhilekoko 31 egunetan. Joan den astean Ezkerraldea-Meatzaldea konpainiak ere 12 greba egun egingo dituela eman zuen jakitera.

UGTk ohar batean azaldu duenez, 2023 «zaila izango da Bizkaibuseko garraioan, bost kontzesionarietatik lauk lanuzteak, grebak eta mobilizazioak egingo baitituzte, eta lehen hiruhilekoa odisea bihurtuko dute autobus lineetan normaltasunez bidaiatu ahal izatea».

Busturia Lea Artibaiko Bizkaibuseko langileek 31 greba egun egitea erabaki dute. Zehazki, urtarrilean lanuzteak iragarri dituzte 10, 13, 16, 19, 20, 24, 27 eta 31 egunetan, 6.25etik 9.35era; eguerdian 13.15etik 16.30era; eta arratsaldean 17.55etik 21.35era. Hilaren 7an eta 17an, larunbatak biak, lanuzteak 10.15etik 14.40ra eta 18.15etik 22.30era izango dira.

Otsailean, 24 orduko greba egingo dute otsailaren 6an, eta lanuzte partzialak beste hamar egun hauetan: 2, 3, 8, 10, 14, 17, 20, 23, 24 eta 28. Martxoaren 16an 24 orduko greba-eguna deitu dute eta gainontzeko egun hauetan, lanuzte partzialak: 2, 3, 6, 8, 11, 17, 21, 22, 24, 27 eta 31.

24 orduko greba-egunetan, otsailaren 6an eta martxoaren 16an, manifestazioa egingo dute Bilbon, 8.00etan, eta elkarretaratzea Foru Jauregian 10.00etatik 10.30era. Hilean bitan gutxienez, enpresaren bulegoetan egingo dute protesta, Aparcavisan.

Ezkerraldea Meatzaldeako EMBk 12 greba egun deitu ditu urteko lehen hiruhilekorako, eta Vectalia Txorierri eta Vectalia Enkarterri konpainiek datozen egunetan iragarriko dituzte bidezko hitzarmen baten aldeko greba egunak, UGTk jakinarazi duenez. Kasu guztietan, eskatzen dutena da «langileen lan baldintzak eguneratzea, KIaren arabera. Avanza Durangaldean egin duten bezala».

UGTko ordezkariek Bizkaiko Foru Aldundiari eskatzen diote, Bizkaibuseko zerbitzuaren arduraduna den aldetik, «fede onez negoziatzeko» eta KPIren inguruko soldata-igoerak adosteko bitartekaritza lanak egin ditzan, «zerbitzuaren emakidadun desberdinenetako langileen artean diskriminaziorik egon ez dadin».

Oscar Lopez enpresa-batzordeko presidenteak ohartarazi duenez, «egoera enkistatu egin da, eta horrek guztiak adierazten du gatazka denboran luzatzeko bidean doala, horrek BLB enpresak ustiatzen dituen lineetako herritarren artean ekarriko duen eraginarekin». UGTko ordezkariek osatutako enpresa-batzordeak adierazi duenez, «gatazkaren konponbiderik ez badago, ez da bake sozialik egongo».