PP eta Voxen gehiengoarekin, Andaluziako Parlamentuak Doñanako Parke Nazionalaren sail ureztatua handitzeko lege-proposamenaren tramiteak hastea onartu zuen asteazkenean. Horren aurrean, Europar Batasunak isunarekin mehatxatu du, Gobernu espainola guztiz aurka agertu da eta erakunde ekologistek horrek dakartzan arriskuez ohartarazi dute.

Alderdi eskuindarrak eta ultraeskuindarrak, ezkerrekoen ezezkoarekin eta Andaluziako Gobernuaren bermearekin, aurrera atera dute Parlamentuan Doñanako parkearen iparraldeko koroan ureztatu daitekeen eremua zabaltzen duen lege baten premiazko izapidetza.

Azalera ez da testuan zehazten eta PPk ez du zenbatekoa izango den esan. Hala ere, elDiario.es hedabideak gogora ekarri duenez, Juan Manuel Morenoren Gobernuak Europako Batzordeari bidalitako gutun batean 748,62 hektarea legeztatzeko asmoa zuela esan zuen iazko otsailean.

Sail horren barruan dauden lursail gehienak landatuta daude akuiferotik hartutako urarekin. Proposamenean azpimarratzen da nekazariek erabili ahal izango duten ura, ahal izanez gero, azaletik etorritakoa izan beharko dela eta ez akuiferotik. Hala ere, gaur egun ez dago baliabiderik ura pilatzeko eta ontziz aldatzeko. Horri inoizko lehorterik handiena gehitu behar zaio.

Bruselaren ohartarazpena

Honen harira, Teresa Ribera Gobernu espainoleko Trantsizio Ekologikorako eta Erronka Demografikorako ministroak kritikatu du lege-proposamenak Huelvako nekazariek «existitzen ez den» ura erabiltzeko aukeraren inguruan itxaropen faltsuak sortzen dituela. Gainera, PPren eta Voxen «elektoralismoa» gaitzetsi du.

Ostegun honetan, Europako Batzordeak ohartarazi du «beharrezkoa bada» Gobernu espainolari eska diezaiokeela Doñanako parkea babestu dezan eta gogorarazi du froga zientifiko eta tekniko «sendoak» dudela lurpeko uren gehiegizko ustiapenaren «ondorio kaltegarriei» buruz.

Bestalde, SEO Birdlife ornitologia elkartea «Doñanaren biziraupena arriskuan jarriko» duelakoan dago eta erabakia «Andaluziako Gobernuak legegintzaldiaren hasieran egindako adostasun eta elkarrizketa promesarekin bat ez datorrela» salatu du.

Orain, testua Sustapen Batzordean eztabaidatuko da, eta ez Ingurumen Batzordean. PPk defendatzen duenez lurralde berrantolaketa bat da, nahiz eta ondorioa urik gabeko eremu batean ureztatu daitekeen lursaila handitzea den.