Europar Batasuneko eta Ukrainako udalerrien arteko 30 lankidetza aliantza sortzeko ‘Bridges of Trust’ (Konfiantzazko zubiak) proiektuan parte hartuko dute Bilbo, Donostia, Gasteiz eta Eudelek. Bilbok eta Novomoskovskek, Donostiak eta Kremenchukek, eta Gasteizek eta Nikopolek lankidetza proiektuak landuko dituzte ukrainarrei oinarrizko zerbitzuak emateko, hala nola ur-hornidura eta saneamendua, edo gerraren ondoren ekonomiaren eta hiriaren garapena bultzatzeko.

Datorren astean, Ukrainako tokiko agintariak Euskal Herrira etorriko dira azterketa bisita baten barruan, eta euskal hiriburu bakoitza bere Ukrainako bikotekidearen anfitrioia izango da, lankidetza sustatzeko.

Europako Udalerrien eta Eskualdeen Kontseiluak (CMRE) ‘Bridges of Trust’ ekimenean parte hartzeko hautatutako tokiko gobernuen hamar elkarteetako bat da Eudel. Ekimen horrek Errusiaren erasoek gehien kaltetutako Ukrainako herriak berreraikitzen lagunduko du. Bilbo, Donostia eta Gasteizko udalek osatzen dute Europako 30 hiriren zerrenda, eta «urrats bat aurrera eman dute Ukrainari laguntzeko».

Europako Batzordearen eta U-Lead with Europe programaren babespean, esperientzia berritzailea da. Eudelek azpimarratu du Ukrainako Hirien Elkartearen (AUC) eta Europako elkarteen arteko koordinazioa «funtsezkoa» dela «herrialde bakoitzean tokiko aliantzak ehuntzeko».

Aurtengo otsailean, Eudelek beste bederatzi elkarterekin batera ekin zion proiektu honi eta bere balioa «elkartasun loturetatik harago» doala, «indarrak batzea eta EBko ahalik eta udalerri gehien berreraikuntzan inplikatzea» duela helburu nagusi adierazi du. Aldi berean, tokiko gobernuek Ukraina Europan integratzeko dituzten gaitasunak ere indartu nahi dira.

Lankidetza proiektuak

Lankidetza hiri bakoitzerako berariazko hiru berreraikitze proiektutan gauzatuko da: uren hornidura eta saneamendu sarea berreskuratzea, Bilboren eta Gasteizen kasuan, eta garapen ekonomikoa eta hiri eraldaketa, Donostiaren kasuan.

Bilbok parte hartuko duen proiektua ur hornidurako, estolderiako eta hondakin uren tratamenduko sareak berreraikitzeko eta hobetzeko da, eta Bilbao Bizkaia Ur Partzuergoaren aholkularitza izango du.

Donostiakoak ekonomia garatzeko, hiria eraldatzeko eta Europako proiektuak kudeatzeko bultzada eta estrategiarekin zerikusia izango du, eta Donostiako Sustapenarekin lankidetzan arituko da.

Azkenik, Gasteizko proiektuaren ardatza ur hornidurako, estolderiako eta hondakin uren tratamenduko sareak berreraikitzea eta hobetzea da, hori guztia AMVISAren aholkularitzarekin.

Topaketa telematiko batzuk egin ondoren, ekainaren 19tik 23ra, Novomoskovsk, Kremenchuk eta Nikopoleko tokiko agintarien ordezkaritza batek Euskal Herrira bidaiatuko du. Eudelek ekainaren 19an (astelehena) eta 23an (ostirala) hartuko ditu hasierako eta amaierako bilerak. Ekainaren 20an, 21ean eta 22an, Ukrainako ordezkaritza hiru taldetan banatuko da, eta tokiko agintari bakoitza EAEko hiriburu parekatura joango da aldebiko bilerak egiteko eta dagokion lankidetza proiektua lantzeko.

Hiru hiriburuek eta erakunde bideratzaileek (BBUPk, AMVISAk eta Donostiako Sustapenak) jarduera-programa propio bat diseinatu dute, eta, besteak beste, topaketa instituzionalak, lankidetza-proiektuaren azpiegituretara bisitak eta hiriko beste ekipamendu eta gune enblematiko batzuetara bisitak egin dituzte.