Itsas Salbamendu Humanitarioaren Aita Mari ontzia igande honetan iritsi da Italiako Salerno portura, eta bertan lehorreratu dira Mediterraneo Erdialdean erreskatatutako 172 pertsonak, laguntza jaso zuten eremutik egun eta erdi baino gehiago nabigatu ostean.

«Nahiko prozesu azkarra izan da, eta Polizia eta Kostazainak ere artatu ditugu, erreskateari buruzko informazio guztia eskatu baitute», azaldu du Simon Vidal ontzi humanitarioko kapitainak sare sozialetan.

Erreskatatutakoen artean, inoren kargura ez dauden 55 adingabe daude, baita hiru eta hamar urte bitarteko lau haur. Baita bi haurtxo ere, osasun-egoera onean daudenak eta guztiek negatibo eman dutenak covid probetan.

«Ume asko iritsi dira ontzi honetara. Denak ahalik eta hoberen artatuko ditugu pare bat egun barru. Ez da nahikoa lehorreratze fasean laguntzea, baizik eta haien ibilbideak jarraitu behar ditugu etorkizun hobea bermatzeko», nabarmendu du Paola de Roberto Salernoko Udaleko Gizarte Politiketako zinegotziak, tokiko hedabideen arabera.

Salernoko portuan Giancarlo Conticchio prefektua ere bazegoen, eta esan duenez, «batzuk Salerno probintzian geratuko dira, eta gainerakoak Campania eskualdeko beste probintzia batzuetan. Denak afrikarrak dira, asko Mali eta Burkina Fasokoak».

Ontzi humanitarioak Italiako Lampedusa uhartearen hego-mendebaldeko zazpi ontzitan zeuden 294 pertsonetatik 172 erreskatatu zituen joan den asteartean, Resqship GKEko Nadir belaontziaren laguntzarekin.

Resqshipek azaldu zuenez, Aita Marik 172 migratzaileak erreskatatu ondoren, orduak eman zituzten kostazainen zain. Iritsi zirenean, 125 lagunez arduratu ziren, eta Lampedusara eraman zituzten. Lampedusako harrera-zentroa gainezka dago duela egun batzuetatik.

Aurten 58.171 migratzaile iritsi dira Italiako kostaldera, Barne Ministerioaren erregistroen arabera, iazko epe berean baino 24.808 migratzaile gehiago.

Eta gutxienez 26.924 migratzaile hil edo desagertu dira Mediterraneoan 2014tik, mundu osoan erregistratutako 56.000 biktimen ia erdia, Migrazioetarako Nazioarteko Erakundearen estatistiken arabera.