Landalan enpresak, Galdakaoko El Vivero adingabeen zentro publikoa kudeatzen duenak, 31 langileetatik 9 kaleratu dituela salatu du ELA sindikatuak. Bizkaiko Diputazioaren menpeko zentroa da eta Aldundiak espazioa hustu eta adingabeak beste zentro batzuetara eramatea erabaki du.

«Bizkaiko Gizarte Urgazpenerako Foru Erakundeak eta Landalanek sinatutako hitzarmena 2022ko abenduaren 31n amaitu zen, eta Landalanek Aldundiari jakinarazi zion ez zuela baliabidea kudeatzen jarraitzeko asmorik, in extremis, baina luzapen akordioetara iritsi dira aurtengo abendura arte», sindikatuak azaldu duenez.

Halaber, ELAren arabera, denbora horretan, zentroa Lehen Harrerara zuzendutakoa izatetik Emantzipaziora zuzendutakoa izatera igaro da, eta adingabeak sare itunduko beste zentro batzuetara eraman dituzte. Jarduteko modu hori ez da ohikoa eta El Viveron zeuden adingabe kopurua erdira murriztea eragin du.

«Hori aprobetxatu du Landalanek 9 langile kaleratzeko eta oraindik lanean jarraitzen duten langileen lan baldintzak aldatu eta okertzeko», azaldu du ELAk. Gaineratu dutenez, Zornotzan dagoen Elguezabal zentroan jazotako sutearen ondoren adingabeen zentroa berriz ireki zenean, Agintzari enpresaren esku geratu zen haren kudeaketa eta bertan lan egiten zuten Landalaneko langileak ez zituzten subrogatu, El Viveron kokatuko zituztela agindu bazuten ere.

Halaber, sindikatuak jakitera eman du Landalan Emankor enpresaren menpekoa dela eta, beraz, Aldundiak bazterketa arriskuan dauden gazteentzako daukan ‘Zabalbideak’ programa ere kudeatzen duela.

ELAk argi utzi nahi izan du mobilizazioa funtsezkoa dela pertsona horien lanpostuak defendatzeko, beraz, kaleratutako langileak berriz onartzen ez badituzte, mobilizazio ziklo bati ekingo diotela iragarri dute.