Astigarragako XXIII. Sagar Uztako ekitaldi nagusiak igande honetan izan dira, eta bertan ez da falta izan sagar biltzea familientzako, sagar azoka edota sagardogintzako lanen erakusketa. Sagar muztioa egiteko aukera urriko asteburu guztietara ere luzatuko da.

Foru enparantza jendez bete du Sagar Uztako azken egunerako antolatutako egitarauak. Goizeko 9.30ean ekin diote txistulariek herriko kaleak musikaz alaitzeari. 10.00etan familiartean Sagardoetxean sagarrak biltzeko aukera izan da eta, ondoren, kalejiran joan dira Foru enparantzara arte. Bertan, Sagarraren Szoka zeukaten zain, sagarren erakusketa eta dastaketarekin, sagardo eta muztio dastaketarekin, eta herriko baserritarren produktuen salmentarekin, besteak beste.

Bitartean, trikitilariek alaitu dituzte herriko kaleak eta 12.30ean Sagar dantza eta kirikoketa izan dituzte plazan bertan. Horrez gain, Herri Bazkaria egin dute eguerdian, 14.30ean.

Uzta oparoa

Uzta hasi berria da eta aurreikuspenak betetzen badira, sei milioi kilo blitzea espero dute, horiekin lau milioi litro Euskal Sagardo egiteko, inoizko kopururik handiena. Une honetan Euskal Sagardoaren barruan 250 sagargile daude eta 500 hektarea inguru sagasti. Sagar hau guztia Jatorri Deiturako 50 sagardotegietara joaten da, Euskal Sagardoa ekoizteko. Datozen urteetan, produkzioan sartu berriak diren beste 150 hektarea gehituko zaizkie.