Iruñeko Arrotxapea auzoko biztanleek narkopisu batek sortzen dituen arazoak konpontzeko eskatu dute gaur egin duten elkarretaratze batean. «Egoera batzuk konplexuak direnez, administrazio publikoek behar bezala esku hartu beharko lukete, baina ez Poliziaren esku-hartze hutsa, baizik eta bizitza- eta lan-baldintza duinak bermatuko dituen jarduteko modu baten bidez», nabarmendu du RTX Auzolan ekimenak.

«Esate baterako, San Pedroko Monasterio Zaharra kaleko bizilagunak, bizikidetza-arazoak izaten ari dira, etxebizitza bat droga saldu eta erosteko erabiltzen dutelako. Narkopisu izenez ezagutzen den etxebizitzako horietako bat da», azaldu dute.

«Orain arte agintariek beste alde batera begiratu besterik ez dute egin, beren izenean gobernatzen dutela diotenen ongizatea bilatzeko betebeharrari jaramonik egin gabe. Egun batean prentsan bizilagunok kezkaz salatzen genuen tragediaren berri ematen duen arte», gaineratu dute.

Izan ere, joan den urrian etxebizitza horretan gizonezko eta emakumezko bana larriki zaurituak izan ziren labanez egindako erasoaldi batean. Komunikabide zenbaitek auzokideak elkarrizketatu zituzten orduan, bertan droga saltzen zela argitara emanez.

«Iruñeko Udalak, Nafarroako Gobernuak bezala, neurri egokiak hartu behar ditu, esku-hartze soziokomunitarioko profesionalaren baliabideak handituz», nabarmendu du RTX Auzolanek.