«Testuinguru ekonomiko konplexu» batean murgilduta, Kubak «esne hautsa erosteko EMPren laguntza eskatu du, haur kubatarrei hornidura bermatzeko», Cubadebate albiste atari ofizialak bere webgunean jakitera eman duenez. 

Nazio Batuen agentziaren kudeaketarekin, «datozen egunetan Brasildik datorren ontzi bat iritsiko dela ziurtatu da, 375 tona esne hautsekin, zero eta sei urte bitarteko umeentzat banaketa bermatzen duena», azaldu du.

Hamarkada askotan, Kubako Gobernuak 7 urtetik beherako haurrentzat eta gaixoentzat esnea prezio baxuan bermatu du, baina azken urteetan batzuetan ezin izan du hornitu.

Otsailaren erdialdean, agintariek onartu zuten hilabete horretan ezin izan zutela banatu adingabeei ematen dieten esnea, kubatar guztiek eskura duten hornidura txartelaren bidez.

Betsy Diaz Velazquez Barne Merkataritzako ministroak, orduan, tokiko prentsari esan zion sei hilabetetik bi urtera bitarteko haurrentzat soilik «10 egunetarako» esnea bermatu ahal izango zuela, eta 2-6 urtekoentzat «kilo erdi 5 egunetarako».

Kubak 500 tona esneki erosi zituen Estatu Batuetan, aldez aurretik eta eskudirutan ordainduta. Izan ere, Washingtonek baldintza horiek ezartzen dizkio uharteari produktu jakin batzuetarako. Duela sei hamarkada baino gehiagotik indarrean dute Kubaren aurkako enbargoa AEBek, nahiz eta Nazio Batuen Erakundearen Batzar Orokorrak urtero bukatzeko exijitzen duen.

Horrez gain, 245 tona erosi zituen Kanadatik, 500 tona Brasildik eta 600 tona beste hornitzaile batzuetatik, Cubadebatek zehaztu duenez.

2021az geroztik, denda pribatuek ere esnea saltzen dute, baina prezioa altuegia da herrialdeko batez besteko soldatarekin alderatuta.

Hiru hamarkadatan izan duen krisi ekonomiko larriena pairatzen ari da Kuba eta 2023an %30era iritsi zen inflazioa, zifra ofizialen arabera. Testuinguru horretan, Kubak zailtasunak ditu oinarrizko elikagaiak ekoizteko eta inportatzeko.

Otsailaren amaieran, agintariek «finantza eta logistika murrizketak» ere onartu zituzten, familiei ogia bermatzen dien garia izateko.

Agintariek irin falta Kubak kanpoan erosten dituen gari ontzien atzerapenari egotzi zioten, eta herrialdeak dituen bost errotetatik bakarra dabilela.

Errota horrek «250 tona ekoizten ditu egunean, eta 700 tona kontsumitzen dira», agintarien arabera.

Irailean, Gobernuak jakinarazi zuen «familiaren saskiaren ia %100» inportatzen duela.