Unicefek 23 herrialdetako datuetan oinarritutako txosten batean ohartarazi duenez, Europa eta Asia erdialdean beroaren gorakadak urtean 400 haur inguru hiltzea eragiten du. Zehazki, tenperaturen gorakadak 377 haur hil zituen 2021ean, erakunde horren arabera.

Horrela xehatzen da ‘Borroka ezazu beroa: haurren osasuna Europako eta Asia erdialdeko bero-boladen aurrean’ azterlanean. Horren arabera, haur horien erdiak  beren bizitzako lehen urtean hil ziren beroarekin lotutako gaixotasunen ondorioz, gehienak udako hilabeteetan.

Regina de Dominicis Unicefen Europa eta erdialdeko Asiako zuzendariak adierazi duenez, 92 milioi haurrek pairatzen dituzte gero eta luzeagoak diren bero-boladen ondorioak, herrialde horietan tenperaturak «munduan erritmo azkarrenean» hazten ari baitira.

Txostenaren arabera, tenperatura altuak jasateak ondorio larriak ditu haurrengan, baita jaio aurretik ere. Kontuan hartu beharreko arriskuen artean daude erditze goiztiarrak, jaiotzean pisu txikia izatea, 20 astetik aurrera haurrak galtzea eta sortzetiko anomaliak.

Dokumentuak azaltzen du, halaber, estres termikoa haurren heriotza kausa zuzena dela, eta ohartarazten du muturreko beroak 32.000 urteko bizitza osasuntsua galtzea eragin diela haur eta nerabeei Europan eta Asia erdialdean.

Unicefek hainbat gomendio egiten dizkie eskualde horietako gobernuei, besteak beste, hondamendi arriskuen politiken eta kudeaketaren bidez bero-boladen eragina murrizteko estrategiak integratzea, alerta goiztiarreko sistemetan eta beroaren aurkako planetan inbertitzea.

Halaber, umeek jolasten duen eremuetan tenperaturak murrizteko instalazioak egokitzea iradokitzen du, edateko ur hornidura bermatzeaz gain.