Ekainetik abuztura, Ipar hemisferioko udako hiru hilabeteek inoiz neurtu den munduko batez besteko tenperatura altuena izan dute, 2023ko errekorra hautsiz; hala jakinarazi du Copernicus Europako behatokiak. Gainera, «azken hiru hilabetean, planetak ekainik eta abuzturik beroenak izan ditu, baita egunik beroena ere», ohartarazi zuen Samantha Burgess Copernicusen Klima Aldaketa Zerbitzuko (C3S) buruordeak.

«Errekor sortak 2024a inoiz erregistratu den urterik beroena izateko aukera handitzen du», gaineratu zuen.

Espainiak, Japoniak, Australiak (neguan) eta Txinak, esaterako, aste honetan iragarri dute bero maila historikoak neurtu dituztela abuztuan.

TIFOIAK, UDA MINAK...

Klimarekin loturiko heriotzak kontinente guztietan gertatu dira. Gutxienez 1.300 pertsona hil ziren bero sapagatik Mekako erromesaldian, ekainean.

Indian, 45 °C-tik gorako tenperaturak jasan ohi dituen herrialdean, sistema elektrikoa guztiz eteteko zorian izan zen eta azpikontinentean ekonomia moteldu zen montzoi eta uholde hilgarrien aurretik.

Ameriketako Estatu Batuetako mendebaldean uda minen ostean piztu diren suteek hainbat hildako eragin dituzte. Las Vegasek 48,9 °C-an izan zuen merkurioa uztailean.

Marokon, uztailaren amaieran, bero izugarriak 21 hildako eragin zituen 24 orduan herrialdearen erdialdean, seigarren urtez jarraian lehorteak jota.

Asian, Gaemi tifoia, uztailean dozenaka pertsona hil eta Filipinak eta Txina suntsitu zituena, berotze globalaren ondorioz areagotu egin da, abuztuan argitaratutako ikerketa batek baieztatu duenez. Une berean, Japonia ere gogor astintzen ari zen Shanshan tifoia bere euri-jasarekin.

Nigerren, Saharaz hegoaldeko basamortuan, klima aldaketaren ondorioz, uholdeek 53 hildako eta 18.000 kaltetu eragin zituzten uztailean.

Etengabeko errekor horiek orain arte ezagutu gabeko ozeanoen (munduaren %70) gehiegizko berotzeak elikatzen ditu, giza jarduerak eragindako beroaren %90 xurgatu dutelako: itsas azaleko batez besteko tenperatura normalak ez diren tenperaturetan da 2023ko maiatzetik.