Osasun Publikoaren Aldeko herri plataformen koordinakundea ostegunean bildu zen Euskal Osasun Itunaren aldeko Mahaiko idazkari teknikoarekin. Azaldu duenez, «bilera horretan argi utzi diogu, koordinakundeak, osasun publikoaren defentsan gizarte eragile aktibo eta erreferentziazkoa den aldetik, mahai honetan egon beharko lukeela, bertan erabakitzen baitira gauzak eta bertan dauden gainerako eragileen baldintza berberetan».

Ohar batean OPAk adierazi duenez, «itunaren idazkariak adierazi digu berak ez duela erabakitzeko inolako ahalmenik, bilera informala zela eta bilera horren helburua orain arte prozesua nola eman den jakinaraztea eta dagoeneko publikoa den dokumentazioaren zati bat helaraztea zela». «Agerian geratu da Sailak uko egin diola euskal gizartearen zati batek itunean parte hartzeari, OPA plataformen koordinatzailea baztertuz», nabarmendu du.

«Horregatik guztiagatik, koordinakundeak edukirik gabeko eta Osasun Itunetik kanpoko aldebiko bilera gehiagotan ez parte hartzea erabaki dugu, eta salatu nahi dugu Eusko Jaurlaritzako Osasun Sailak, Alberto Martinez sailburua buru duela, aurpegia garbitzea eta koordinadora Itunatik baztertzea baino ez duela bilatu», gaineratu du, itunaren metodologia kritikatzearekin batera, «izan ere, parte-hartzeaz gain, eztabaida plurala, demokratikoa eta gardena eragozten duelako».

«Bestalde, egin den diagnostikoaren gure balorazio oso kritikoa helarazi dizugu, ez baita euskal osasun publikoaren egoerari buruzko diagnostiko erreala eta ez du Osakidetza egoera kritiko batera eraman duten arrazoien baloraziorik jasotzen; beraz, ezinezkoa da egiturazko arazoei benetako konponbideak aurkitzea diagnostiko on batetik abiatzen ez bada», dio.

OPAren esanetan, «eztabaidatik kanpo geratzen dira pribatizazioa eta horrek osasun publikoan dituen ondorio gaiztoak. Bestalde, aplikatzen ari diren murrizketen eta Lehen Mailako Arreta uztearen eragina ere ez du aztertzen».

Honen aurrean, OPAk berretsi egin du «osasun sistema publikoa, kalitatezkoa, integrala eta unibertsala defendatzen jarraitzeko borondatea; eta, horretarako, parte-hartzearen eta gizarte mobilizazioaren aldeko apustua egiten dugu, tresna nagusi gisa».