Gutxienez 120 palestinar hil dira Gazako Zerrendan azken 48 orduetan Israelen erasoen ondorioz, eta genozidioa hasi zenetik 44.200 biktima izan dira, Gazatiar Osasun Ministerioaren arabera.

Zaurituen kasuan, Ministerioak 205 baieztatu zituen azken bi egunetan, eta, guztira, genozidioa hasi zenetik, 2023ko urriaren 7tik, 104.473 dira, zenbaketa horren arabera. Gainera, hondakinen azpian 11.000 pertsona desagertu direla uste da.

Zerrendako hainbat puntutan hildakoak izan diren arren, azken 40 egunetan Israelen erasoaldia iparraldera bideratu da, batez ere Yabalia eta Beit Lahia hirietara, 2.300 hildako eta 6.000 zauritu baino gehiagorekin.

Kamal Adwan ospitaleari eraso egin diote berriro Israelgo drone batek sorgailu elektrikoa, ur-tanga eta oxigeno biltegiak suntsitu ostean. «Badirudi ez dagoela mugarik Gazan palestinarrei ezarritako krudelkerian. 40 egunez baino gehiagoz, iparraldeko biztanleria setiatuta dago: inguratuta, bonbardatuta, oinarrizko biziraupen-baliabideak kenduta eta mehatxupean ihes egitera behartuta», salatu du Jonathan Whittal OCHAren (Gai Humanitarioetarako NBEren Bulegoa) Palestinarako bulegoko buruak.

Whittalek adierazi zuen bere taldeek hilabete baino gehiago daramatela Yabalia, Beit Lahia eta Beit Hanun hirietara sartu nahian, hiri horiek baitira kaltetuenak, baina Israelgo agintariek atzera bota dituztela eskaera guztiak.

«Emaitza? Jendea hondakinen azpian dago, erreskatatu gabe. Gaixoak eta zaurituak ezin dira ospitaleetara iritsi. Edateko ura eta elikagaiak agortu egin dira. Bizitzak galdu dira», adierazi zuen.

Beiruteko erdigunean 30 hildako

Gutxienez 30 pertsona hil eta 63 zauritu dira larunbat goizaldean Israelgo Armadak Beiruten, Libanoko hiriburuan, egindako aire-eraso batean, Libanoko Defentsa Zibilaren arabera.

Erasoa Basta el Faouqa auzoan izan da, hiriaren erdialdean, eta bilaketa eta erreskate taldeek lanean jarraitzen dute lurperatuta geratu direnak hondakinen artetik bizirik ateratzeko ahaleginean.

Erasoaren helburu nagusien artean zortzi solairuko bizitegi-eraikin bat dago, nahiz eta aldameneko zenbait higiezinek ere kalteak jasan dituzten, NNA Libanoko albiste-agentziak jaso duenez.

Al Arabiya kateko eta Kan Israelgo irrati publikoko iturrien arabera, erasoa Mohamed Haydar Hezbolako goi-kargudun baten aurkakoa zen, erakundeko buruzagitza militarra den Jihad Kontseiluko kidea.

FINULen segurtasuna bermatzeko eskaria

AEBko Defentsa idazkariak, Lloyd Austinek, Israeli eskatu dio ahal duen guztia egin dezala NBEk Libanon duen bake misioaren segurtasuna bermatzeko eta Gazako egoera humanitarioa hobetzeko neurri gehigarriak hartzeko.

Austinek telefonoz hitz egin du Israelgo ministroarekin, eta «Libanoko Armadaren eta FINULen segurtasuna bermatzearen garrantzia» azpimarratu dula jakinarazi du.

Libanoko agintarien ustez, gutxienez 41 militar hil dira iazko urrian Gazako gerra piztu zenetik eta Hezbolaren eta Israelen arteko borrokekin Libanoren eta Israelen arteko mugara berehala hedatu zenetik.

Halaber, idazkariak Israelgo Gobernuari eskatu dio «Gazako baldintza humanitario izugarriak hobetzeko neurriak hartzen jarraitzeko», eta berretsi du «AEBek Hamaseko milizia palestinarren esku dauden bahitu guztien askapena bermatzeko konpromisoa».