Maiatzaren 18an espetxe politikaren aurka plazak betetzeko deia egin du Herrirak

Datorren maiatzaren 18an Euskal Herri osoko plazak betetzeko deia egin du Herrira mugimenduak. Ekimenaren bitartez, azaroaren 10ean eta urtarrilaren 12an Baionan eta Bilbon eginiko mobilizazioetan erakutsitako «adostasun zabala» herri, auzo eta hirietara eraman nahi dute.

Bilboko Itsas Museoaren aurrean eginiko agerraldi baten bitartez, M18Plazara ekimena aurkeztu du Herrira mugimenduak.

Beñat Zarrabeitia eta Nagore Garcia bozeramaleek adierazi dutenez, ekimenaren helburua «argia» da: «Giza eskubideak, irtenbidea, bakea eta espetxe politikaren aldaketa eskatzen dituen pankartaren atzean ahalik eta borondate gehien barnebiltzea».

Zentzu horretan, Baiona eta Bilbon izandako mobilizazio historikoek izandako babesa oinarri hartuta, eragile eta instituzioei dei egin diete, M18Plazara ekimena «modu aktibo eta eraginkorrean» babestu dezaten.

Era berean, herritarrei ere mobilizazioetan parte hartzeko gonbitea egin diete, bai Euskal Herrian, bai arrazoi desberdinengatik bertan egongo ez direnei, «giza eskubideak, konponbidea, bakea eta espetxe politikaren aldaketaren aldarria munduko plazetan lau haizetara zabaldu dezaten».