Foro Sozialaren gomendioen aplikazioa aztergai izango dute adituek Baionako zitan

Lokarrik eta Bake Bideak antolatuta larunbatean Baionan egingo den Bakearen aldeko topaketak, sona handiko nazioarteko adituen parte-hartzea izango duenak, Foro Sozialaren gomendioen aplikazioan sakontzeko eta bake prozesuan jendartearen esku-hartzea indartzeko helburua du. 

Baionako bilkuraren antolatzaileek ohar bide jakinarazi dutenez, «bake prozesuan jendartearen parte-hartzea sustatzeko» helburua du eta, zehatzago, Foro Sozialaren gomendioen inguruan eztabaidatu eta hausnartzeko.

Nazioartean ezagunak diren adituak izango dira larunbatean Baionako Unibertsitatean, bake prozesuan inplikatuta daudenak edota unibertsitate akademikoak. Publiko gisa doazenei ere parte hartzeko eta interakziorako aukera emango zaie.

Honakoa izango da egitaraua:

9.00-9.14 Baionako Unibertsitateko dekanoak, Christian Labennek, edo haren ordezkariak, harrera egingo diete parte-hartzaileei. Bake Bideak eta Lokarrik ere ongietorria egingo diete bertaratutakoei.

9.15-9.45 Gomendioen genesia

- Brian Currin abokatu eta Nazioarteko Harreman Taldeko (NHT) kideak gomendioen lanketaren testuingurua izango du hizpide.

- Veronique Duduouetek, gatazken konponbidean doktore denak, gomendioen elaborazioaren metodologia izango du aztergai.

9.45-11-15 Gomendioen edukia

Moderatzailea: Emilie Matignon, Zuzenbidean Doktorea.

Hizlariak:

- Silvia Casale NHTko kidea presoez eta gatazken konponbideaz mintzatuko da.

- Pierre Hazan NHTko kidea justizia trantsizionalaz, egiaz eta berradiskidetzeaz arituko da.

- Aaro Suonio (nazioarteko segurtasunean eta krisien kudeaketan aditua eta Ipar Irlandako Desarmatzearen Komisioaren gabinete burua) Desarmatzeaz, desmobilizazioaz eta integrazioaz mintzatuko da.

9.45-10.30 Mahaingurua.

10.30-11.15 Publikoak idatzitako galderei erantzuna.

11.15-11-30 Atsedena

11.30-13.00 Gomendioen aplikazioa

Moderatzailea: Magalie Besse, doktoregaia eta Baionako fakultateko irakaslea.

Hizlariak:

- Henri D'Uhalt, Bake prozesua indartzeko batzordeko kidea.

- Anaiz Funosas, Bake Bideko kidea.

-Raymond Kendall, Interpoleko idazkari nagusi ohia eta NHTko kidea.

- Paul Rios, Lokarriko koordinatzailea.

11.30-12.15 Mahaingurua.

12.15-13.00 Publikoak idatzitako galderei erantzuna.

13.00-13.30 Sintesia

Jean Pierre Massias, zuzenbide publikoko irakaslea eta Justizia Trantsizionalaren Elkarte Frankofonoaren lehendakaria.