Jasandako torturak eta auziaren izaera politikoa salatu dituzte auzipetuek azken hitzean
Amaitu da irailean hasi eta gaur arte luzatu den 28 gazte independentisten aurkako epaiketa. Azken hitza hartzearekin batera jasandako torturak eta dispertsioa salatu dituzte auzipetuek eta baita epaiketaren izaera politikoa ere. Murillo epaileak hitza kendu die salaketa egitean.
This browser does not support the video element.
Hiru hilabetez luzatu den 28 euskal gazteren aurkako epaiketa gaur amaitu da Madrilgo Auzitegi Nazionalean. Iragan asteartean haien arteko 12ri akusazioa kendua zien fiskaltzak, baina beste 16 gazteri akusazioa mantendu zien.
Azken hitza baliatu dute gaur gazte auzipetuek jasandako torturak eta dispertsioa salatzeko eta baita auziaren izaera politikoa bera ere. Epaileak, Angela Murillok, ez du begi onez ikusi salaketa eta azken hitza eten dio Imanol Salinas auzipetuari.
Astezkenean zen amaitzekoa epaiketa, baina azkenean gaur arte luzatu dute. Defentsaren abokatuek absoluzioa eskatu dute guztientzat euren ondorioetan. Besteak beste aurkeztu diren froga gehientsuenak torturapean lortutako adierazpenetan oinarritzen direla adierazi dute abokatuek.