Gotzon Amaro preso bilbotarraren lagun batek istripua izan du bisitara bidean

Valladolideko espetxera bidean zela istripua izan du Gotzon Amaro preso bilbotarraren lagun batek. Dispertsioak aurten eragin duen bosgarren istripu honetan ez da inor zauritu, baina Amaroren lagunaren autoak kalte larriak izan ditu.

Etxerat elkarteak jakinarazi duenez, Palentzia parean gertatu da istripua. Valladolidera bidean zen lagunak autoaren kontrola galdu du kamioi bat aurreratzen ari zela eta erdibitzailearen aurka hartu du kolpea.

Gidaria ez da zauritu, baina autoa garabiak eraman behar izan du. Etxeraten arabera, aseguru-etxeak beste auto bat utzi dio eta garaiz iritsi da bisitara.

Gotzon Amarok zazpi urte daramatza espetxean, eta 2016ko irailean du finkatuta irteera data.

Aurten dispertsioak eragin duen bosgarren istripua izan da aipatutakoa. Sakabanaketaren «errusiar erruletaz kokoteraino» dagoela adierazi du Etxeratek.