Jendetsuak eta jazoera «oso larririk» gabeak izan dira Baionako bestak
«Baionako bestak ongi igaro dira eta oso balorazio ona egiten dugu», nabarmendu zuten atzo Lapurdiko hiriburuko agintariek, Jean-Rene Etchegaray auzapeza buru zutela. Alde okerrak «oso larriak» ez direla izan esanda, datorren urterako hitzordua jarri zuen.
Biziki kontent agertu ziren atzo Baionako udal agintariak, suprefeta eta fiskala, igaro berri diren besten bilana egiterakoan. «Pozik naiz ikusirik jaiak ahalik eta baldintza onenetan igaro direla», esanez zabaldu zuen agerraldia Jean-Rene Etchegaray auzapezak, baina aitortu zuen tartean gertaera okerrak ere izan direla.
Horien artean Samuel Vuelta fiskalak bereziki nabarmendu zituen lapurretak: «Bestetako ‘izurritea’ izan dira. 233 salaketa jaso ditugu, gehienak telefono mugikorrak edo diru-zorroak ebatsi dizkietelako. Horren harira zortzi pertsona atxilotu dira eta berehalako prozedurarekin zazpi dagoeneko epaitu dituzte. Gainera, bi operaziotan 90 sakelako telefono berreskuratu dira eta horrek garbi uzten du antolatutako taldeak zirela».
Pertsonen kontrako erasoen artean, «gehientsuenak nahiko arinak» izan dira, Vueltaren esanetan. «Hiriburutik pasatu den jendetza kontuan harturik, salaketa kopurua ere ez da handia izan». Sexu gehiegikeriekin zerikusia duten aferak aipatzerakoan, «gai aski labaina denez, ondorioak zehaztu aitzinetik zuhur jokatu» behar dela adierazi zuen. Orotara zazpi salaketa izan dira. Horietatik lau –felazioa egitera ustez bortxatutako gizon gazte baten salaketa barne– «faltsuak» zirela esan zuen.
Hiru ikerketa zabalik
Gainerako hirurentzat ikerketak zabaldu dituzte. «Bata da EITBko kazetariak jarri zuena; eta beste biak, lehen datuen arabera, ez lirateke izaera horretako erasoak izango. Oraingoz ez dugu bortxaketa edo gehiegikeria larrien aztarnarik», gaineratu zuen fiskalak.
Alkohola eta beste substantzien kontsumoarekin lotutako arau-hausteak 158 izan dira, iaz baino 18 gehiago, baina 830 kontrol gehiago egin dira aurten, 4.284 orotara. Istripu larririk ere ez da gertatu eta atxiloketa bakarra egin da. Fiskalaren ustetan, oro har jendea «oso arduratsua» izan da eta kontroletan ez da liskarrik izan.
Patrick Dallennes suprefetak ere balantze baikorra egin zuen. «Borroka eta istilu batzuk jazo dira, baina ez da zauritu larririk izan», adierazi zuen, Glaineko Elkarteen Etxean ezarritako kontrol gune orokorrak «biziki ongi» funtzionatu duela nabarmenduz jarraian.
Sorospen guneetan, berriz, 1.528 pertsona izan dira artatuak (iaz 1.541).
Autobus gidariak
Bai suprefetak bai auzapezak bereziki goraipatu zuten aurtengo bestetan autobus gidariek eginiko lan eskerga. Greba zela-eta, bost egunetan gaueko trenik izan ez denez, autobus zerbitzua indartu dute. «Lan zinez zaila izan dute, batez ere gaueko besta amaitu ostean, baina bikain aritu dira, bai enpresa pribatuetako bai zerbitzu publikoko autobus gidariak», adierazi zuen Etchegarayk.
Aurten, orotara milioi bat festazale izan omen dira Baionan. Kontaketa zehatza egiteko sistemarik ez badute ere, hainbat adierazle kontuan hartuta egin dute kalkulua, horien artean, aparkalekuak (+%2,5), erabilitako edalontzi berrerabilgarrien kopurua (+%5) eta hiriko autobus zerbitzuetan zein konpainia pribatuetan izandako bidaiarien kopurua.