Soto del Realera itzuli da Manu Azkarate, ospitalean hamasei egunez isolatuta egon ondoren
Ultzerak jota daukan hankan atera zitzaion isipula (azalari eragiten dion gaixotasun infekziosoa) artatzeko hamasei egunez ospitaleratua egon ondoren, Soto del Realera itzuli da Manu Azkarate. Gregorio Marañonen izan den egunetan deiak egitea galarazteaz gain, prentsa irakurtzea edo erloju bat izatea ere debekatu diotela salatu du.
Manu Azkarateren senideek NAIZi azaldu diotenez, bart eraman zuten larriki gaixo dagoen preso tolosarra Gregorio Marañonetik Soto del Real espetxera bueltan, hamasei egunez ospitaleratuta egon ondoren.
Ultzerak kaltetuta daukan hankari eragin zion isipula ez zaio guztiz sendatu eta espetxean jarraitu beharko du tratamenduarekin, ezin baitu denbora luzez zutik egon.
Bestalde, senideek azpimarratu dute ospitaleratuta egon den bitartean jasan behar izan dituen baldintzak salatu dituzte: ezin izan du telefono deirik egin (kontrolatzeko moduko telefonorik ez zeukatela esan zieten), ez du prentsa irakurtzeko baimenik izan eta erlojua ere kendu egin zioten.
Horrez gain, familiak oraindik ez du diagnostiko zehatz bat jaso, Azkarate ospitaleratuta egon den egunetan, ez dietelako inolako azalpenik eman, ez zentroan ez espetxean.
Iragan larunbatean, agerraldi jendetsua egin zuten Tolosan, eskualdeko aurpegi ezagunek preso politikoa askatzearen alde sinatu dutela adierazteko.