150 herrialdetako 200.000 erabiltzaileri eragin die eraso informatikoak

Iragan ostiralean hasi zen eraso informatikoa, eta dagoeneko mundu guztiko 150 herrialde ezberdin kolpatu ditu, 200.000 erabiltzaileri zuzenean eraginez. Europolek, baina, datozen egunetan aipatu zifrek gora egin dezaketela ohartarazi du.

Europolek iragan ostiralean hasi zen eraso informatikoaren gaur arte balorazioa egin du: 150 herrialde ezberdin kolpatu ditu, 200.000 lagunei zuzenean eraginez.

Erakundeko zuzendari den Rob Wainwrightek eman ditu datuok ITV kate britainiarrari eskainitako elkarrizketa batean. Eta ohartarazpen bat egin du: bihartik aurrera, lan asteari ekinez, gora egin dezakete aurrez aipatu zifrek.

Zehaztu du agintari nagusiak erasoaren egileek «zizarearen» teknika erabili dutela, birusa automatikoki hedatzea helburu duen teknika hain zuzen.

«Erasoaren hedapenak ez du aurrekaririk. Kaltetu nagusiak enpresak dira, korporazio handiak horietako asko», adierazi du. «Une hauetan, gainera, mehatxuaren igoaldi baten aurrean egon gintezke», gaineratu du.

«Arduratuta» dagoela ere esan du, jendea lanera itzultzean igande honetan eman dituen zifrek gora egin dezaketelakoan.