Brebeta euskaraz egiteko eskubidearen alde Bordeleko Errektoretzan kateatu dira
Seaskako 179 ikaslek euskaraz egin zituzten Brebet probako zientzietako azterketak ez zuzentzeko Errektoretzak hartutako erabakia salatzeko Bordelera joan dira irakasle eta gurasoak eta, bertan Polizia zain zuten arren, atarian kateatu egin dira. Euskaraz ez dakiten ikuskari pedagogikoak jarri dituzte azterketak zuzentzera, Pauen.
This browser does not support the video element.
Atzo eta gaur artean egin beharreko brebet azterketaren prozesuak kezka handia eragin du Ipar Euskal Herrian. Izan ere, Piarres Larzabal, Xalbador eta Manex Erdozaintzi Etxart kolegioetako 179 ikaslek euskaraz eginiko zientzietako azterketak baztertzeko agindua eman baitzuen Bordeleko Errektoretzak, Hur Gorostiaga Seaskako zuzendariaren esanetan, proba horiek «bahitzeko urratsa» emanez.
Erabaki larri honen aurrean, Seaskako irakasle eta gurasoek Bordelera joan dira, Errektoretzaren aurrean azterketak egiteko eskubidea aldarrikatzera.
Bi autobusetan joan dira eta, atarira iritsi direnean, Polizia zeukaten zain. Borrak eskuetan zituztela salatu du Gorostiagak. Bultzaka hartu dituzte poliziek irakasle eta gurasoak, Errektoretzarako sarrera galaraziz. Han kateatu egin dira, sarrera blokeatuz.
Bordeleko errektoretzaren sarbidea blokeatu dute irakasle eta burasoek, batzuk kateatuak daude #BrebetaEuskaraz pic.twitter.com/lne2Pfnz2x
— Iurre Bidegain (@Iurrebidegain) July 4, 2018
Errektoretzaren aurrean bildutakoek piknika egitea ere erabaki dute.
Piknika egitea erabaki dute, eseri dira Errektoretzaren aitzinean. Polizia gehiago iritsi berri da #brebetaeuskaraz pic.twitter.com/Bfei3x1M51
— Iurre Bidegain (@Iurrebidegain) 4 de julio de 2018
13.30ean, lotuta zeuden lagunen kateak moztu ditu Poliziak eta handik minutu gutxira bukatutzat eman dute protesta, Euskal Herrirako bidea hartuz.
Kateak moztu ditu poliziak manifestarien oihu artean: « Brebeta euskaraz! » #BrebetaEuskaraz pic.twitter.com/dOcO1RQfjA
— Iurre Bidegain (@Iurrebidegain) 4 de julio de 2018
Gainera, gaur jakin da euskaldunak ez diren Paueko ikuskari pedagokikoak hasi direla «bahitutako» azterketa horiek zuzentzen.
Ikuskari pedagokioen esku jarri dituzte bahituriko azterketak, Pauen. Irakasle horiek ez dira euskaldunak, bistan da. Frantziako Hezkuntza Ministerioaren jokabide esperpentikoa salatuko du @seaskaikastola k gaur goizean Bordelen. #brebetaeuskaraz
— Maite Ubiria (@Maite_Ubiria) July 4, 2018
Seaskak oso larritzat jo du Errektoretzaren erabakia. Finean, iaz, nahiz eta horretarako baimen ofizialik ez izan, ikasleek euskaraz idatzi zituzten zientzietako azterketak zuzenduak izan ziren. Alta, aurten azterketak blokeatzeko urratsa eman da eta Gorostiagaren esanetan hori «borondate politiko zehazt baten eragina da, eta zalantzarik ez dugu Bordeletik baino Parisetik heldu dela debekua».
Duela zenbait urte matematika eta historia-geografia probak euskaraz egiteko eskubidea eskuratu zuen Seaskak. Iaz urrats berri bat emanez, zientzietako azterketa euskaraz egiteko aukera jorratu zuen. Hartara, inolako berme ofizialik gabe ere, bere ikasleek azterketa euskaraz egin zuten eta Errektoretzak ez zuen oztopatu proben zuzenketa. Aurten, ordea, zuzenketak blokeatzeko agindua eman du.
Bretainian ere bai
Aurten, lehenengo aldiz, Bretainian hamabost ikaslek Baxoa bretoieraz idatzi zuten, eta brebeteko zientzietako azterketa ere hizkuntza horretan egin zuten Diwan eskoletako 80 ikasle inguruk. Kasu honetan ere Errektoretzak ikuskariak bidali ditu, bretoieraz eginiko zientzietako azterketak zuzendu ez ditzaten.