«14 urte nituela sartu nintzen sukaldean eta geroztik ez naiz atera» . mario venerdini (sukaldaria)
Bottega di Mario jatetxeak 2013an zabaldu zituen bere ateak Baiona Ttipian. Bourgneuf karrikako 52. zenbakian kokaturik, bertara sartu bezain pronto Mediterraneoaren koloreak eta lurrina sentituko ditu bezeroak. Mario Venerdini jabea Sardiniakoa da eta mundu zabalean, sukaldetik sukaldera, ibili ondoren, Bordelen eskuratu zuen Euskal Herrira etortzeko «pasaportea». «Neska euskaldun batekin gurutzatu, neska oiartzuar batekin, hobeki esanda, eta, geroztik, Oiartzundik gertu bizitzera behartuta nago!», azaldu du barre algara batekin.
Familia, hangoa eta hemengoa, zutabe garrantzitsua da Mariorentzat. Sardiniako iparraldean dagoen Sassarin jaio zen, duela 45 urte, eta txikitatik murgildu da lapiko artean. «14-15 urterekin sartu nintzen lehen aldiz gure familiak bertan zuen jatetxeko sukaldean, eta berehala sua eta zartaginak nire lagun onenetarikoak bilakatu ziren», azaldu digu.
Alemanian, Irlandan, AEBetan, Parisen... lan egin ondoren, zaporez beteriko sukaldaritza eskaintzen du Lapurdiko hiriburuan. «Nire herrian bezala sentitzen naiz, Euskal Herriko eta Sardiniako jendearen artean antzekotasun handiak badirelako: sardiniar baten etxeko atea jo eta zuhurki hartuko zaitu, behin atea gurutzatuta bizitza osorako laguna aurkituko duzu». Marioren ustez badira behintzat beste bi kontu gure herriak hurbiltzen dituztenak. «Mendiaren eta itsasoaren arteko herrialdeak gara biak, eta ardi gasna paregabeak ditugu!».
Eguneko menua... eta hainbat ohar
Egunotan Mariok eta bere lantaldeak bestazaleen ahosabaia mimatzen jardungo dute. Aurreko urteetan ogitarteko eta mokaduak baizik ez zituzten ematen. Aurten, bestetako menua eskaintzen dute. Sarrera arina –mozzarella, urdaiazpikoa...– eta etxeko pasta proposatu dute.
«Gure ohiko bezeroak dagoeneko ondo irakatsita ditugu, baina jatetxera lehen aldiz etorriko diren bisitariei, besterik ez bada ere, pare bat gauza erakutsi nahi diegu: pasta carbonara erara egiteko ez dela esne-gaina erabili behar arrautza baizik eta bolognesa bikaina egiteko gutxienez hiru haragi mota behar direla erabili... hori, eta sukaldean lauzpabost ordu eman!». Capito, amico.