Arabako boto berdea biltzea eskatu du Elkarrekin Podemos-IUk, «faxismoa gelditzeko»
Elkarrekin Podemos-IUk EAEn eta bereziki Araban «boto berdea» bere koalizioaren inguruan biltzea eskatu du, «faxistak gelditzeko». Voxen aurrean bere burua eskaintzen ari da ere Equoko Joserra Becerrak, bai eta EAJ eta EH Bildu ere.
Miren Gorrotxategi Elkarrekin Podemos-IUren lehendakarigaiak Bastidako hauteskunde ekitaldi batean parte hartu du ostegun honetan Juantxo Lopez de Uralde Ahal Dugu alderdiaren diputatuarekin.
Voxek eserleku bat lortzeko ustezko aukerak alderdi guztiak mobilizatu ditu, eta horien artean dago EP-IU. Lopez de Uralderen hitzetan, garrantzitsua da «iraunkortasuna» Gasteizeko Legebiltzarrean sartzea, «boto berdea Elkarrekin Podemos-IUren proiektuaren inguruan biltzea eta boto ekologista bat bera ere ez galtzea».
Lopez de Uraldek Araban bereziki hala izatearen alde egin du, «faxistak ateetan daudelako eta ez zaielako sartzen utzi behar». «Oinak gelditu behar dizkiegu, ez diezaiegun faxistei sartzen utzi», aldarrikatu du.
Argudio bera horrekin eskatzen zuen José Ramón Becerrak Equoren aldeko botoa NAIZen argitaratutako elkarrizketa batean. «Zalantzarik gabe, euskal herritarrek nahiago izango dute lurralde bakoitzeko azken eserlekua Equok eramatea, Voxek eraman beharrean», adierazi zuen. Eta EH Bildu zein EAJ ere botu eske ari dira argudio berdinarekin; Estatuko hauteskundeetan ezkerreko independentistek jada lortu zuten Javier Maroto eskuindarra kanpoan uztea.
Bestalde, Gorrotxategik Arabako Errioxak osasun krisiak eragindako etorkizuneko erronkei aurre egiteko neurriak eskatu ditu; izan ere, «mehatxu berriak sortu direla adierazi du, «nekazaritzaren inbertsioa arriskuan jartzen dutenak».
«Erakundeetan planak eta neurriak garatzea premiazkoa da», esan du Gorrotxategik, eta Arabako Errioxan inbertsio horiek aktibatzeko beharra azpimarratu du; izan ere, uste du telelana aukera bat dela zerbitzuen sektorean lanean ari diren inguruko herritarrek eskualdean bizitzen jarrai dezaten.
Era berean, turismo iraunkorraren eta Arabako Errioxaren aldeko apustua egin du, «ardo upeltegiak, iragana eta oraina ez ezik, etorkizuna ere izan daitezen».
Lopez de Uraldek aldaketa klimatikoak ardoaren ekoizpenari nola eragiten dion aipatu du. «Aldaketa klimatikoaz hitz egiten dugunean hemengo gauzez hitz egiten dugu eta horregatik atentzioa ematen digu abertzalez jantzitako jendeak aldaketa klimatikoa eragiten duten ekintzak ahalbidetzeak», esan du EAJk Araban gasa ateratzeko duen planari erreferentzia eginez.
Guzti honezaz gain, Gorrotxategik Ordizian emandako koronabirus fokua aipatu du, 58 positiborekin, eta argi utzi du bere alderdiak «errespetatu egiten duela osasun agintariek igandeko hauteskunde egunari begira gomendatzen dutena».