Pfizerren txertoan ez dute albo-ondorio berririk detektatu, EBn hilabetez erabili ondoren

EMA Sendagaien Europako Agentziak baieztatu duenez, «ez da albo-ondorio berririk identifikatu» Europar Batasunean (EB) Pfizer/BioNTech txertoa erabiltzen hasi zenetik pasa den lehen hilabetean.

Europar Batasunean Pfizer eta BioNTech-ek covid-19aren aurka garatutako txertoa erabiltzen hasi eta hilabetera, haren segurtasunari buruzko txostena eguneratu du EMA Sendagaien Europako Agentziak.

Ondorioztatu dutenez, Batasuneko herrialdeetako txertaketa-kanpainetan jasotako datuak «koherenteak» dira entsegu klinikoetako segurtasun-profilarekin. Txostenak nabarmentzen du, era berean, ez dutela albo-efektu berririk identifikatu.

2020ko abenduaren amaieran aipatu txertoa baimendu zenetik jaso eta ebaluatutako datuek islatzen dutenez, ez da albo-efektu berririk detektatu entsegu klinikoetan agertu zirenez gain. Txertoa jaso ondoren hil diren pertsonen kasuak ere aztertu dituzte, hainbat faktore aintzat hartuta (bestelako baldintza mediko batzuk edota adin-talde bakoitzaren heriotza tasa…), eta ondorioztatu dute heriotza bakar batek ere ez dutela lotura zuzenik botikaren efekturarekin.

Nolanahi ere, kasu guztiak «arretaz ikuskatzen» jarraituko duela agindu du EMAko segurtausun batzordeak (PRAC).

AstraZenecaren kontratua, prezio eta egutegirik gabe

Pfizer eta BioNTech-en txertoa EBn baimendu zen lehena izan zen. Urtarrilaren 6an, EMAk eta Europako Batzordeak argi berdea eman zioten Modernaren txertoari, eta ostiral honetarako espero zen Europako zientzialariek AstraZenecak garatutako antidotoaren segurtasunari eta eraginkortasunari buruzko ebaluazioa amaitzea. Eta oniritzia eman dio EMAk.