Kondena amaituta, aske dira Lasagabaster eta Uranga, Xua eta Maddiren gurasoak

Asteburu honetan amaitzen da Patxi Uranga eta Olatz Lasagabasterri ezarritako zigorra. Hirugarren gradua jasota, jada etxean ziren. Xua eta Maddiren gurasoak dira; beren egoera konpontzeko lan eskerga egin da 2019. urtetik.

Jada Xua eta Maddi alabekin ziren etxean, hirugarren gradua eskuratuta, baina orain guztiz aske dira Olatz Lasagabaster eta Patxi Uranga –pultsera kendu diete–, beraiei Auzitegi Nazionalak ezarritako hamabi urtetako kondena asteburu honetan agortu baita.

Usurbilen atxilotu zituen biak 2009ko ekainean Polizi espainolak, ETAko kide izatea egotzita.

Azken urteotan haur motxiladunen arazoaren erakusgarri izan da beren kasua. Xua Valentziako Picassent espetxean jaio zen eta hiru urte betetzean amarengandik banatu zuten, espainiar espetxe araudiak hala agintzen duelako. Aldeko kanpaina zabala piztu zuen honek, Xua Gurasoekin Etxera ekimenaren bitartez, berez Lasagabasterrek zein Urangak kalean egon beharko luketela nabarmenduz (hirugarren laurdenak sobera beteta zituzten) eta egoera konpontzeko eskatuz.

2020ko otsailean, Valentziatik Aranjuezera lekualdatu zituzten eta bertan jaio zen bigarren alaba, Maddi.

Urtebete baino gehiago auzitegietan eta kalean eginiko lanaren ondorioz, pasa den urteko azaroan heldu den arazoa zertxobait leuntzen zuen hirugarren gradua. Martutenera ekarri zituzten hiruak eta bertan ama direnentzako modulurik ez denez, kondena etxean betetzen segitzeko baimena jaso zuen Olatz Lasagabasterrek lehenik, eta Patxi Urangak gero.

Orain etxean eta guztiz aske dira lauak, beraz; kondena jasotako bi gurasoak eta espetxean jaio diren bi haur txikiak.