Covida antzemateko antigeno test azkar berri bat merkaturatu du Biolan Health euskal enpresak

Egoitza Zamudion duen Biolan Health enpresak covid-19a detektatzeko antigeno test azkarra merkaturatu du. Sudurretik hartutako lagin baten bidez birusaren egituraren zati bat antzematen du eta emaitzak 15-20 minutuan ematen ditu.

Komunikabideetara igorritako ohar baten bidez eman du Biolan Health enpresak SARS-CoV-2 birusa detektatzeko antigeno test azkar honen balioztatzearen berri. 

PCR probak egiteko laginak nasofaringetik hartzen diren bitartean, antigeno test hauentzako nahikoa da sudurretik bertatik hartzea. Zamudion egoitza duen enpresaren esanetan, hori «abantaila argia» da erabiltzailearentzat, ez baitu hainbeste molestatzen.

Biolan Health-en test azkarrak «emaitza fidagarria» bermatzen du 15-20 minututan, %96,5eko sentsibilitatearekin eta % 98,3ko espezifikotasunarekin, eta Osasunaren Munduko Erakundeak ezarritako irizpideak betetzen ditu.

Prozesuaren hasieratik amaierara arte

Enpresak hasi eta buka landu duen produktu bat da merkaturatu berri duten hau, prozesu osoa bere gain hartu baitute, hasierako garapenetik abiatu eta fabrikaziora arte. 

Test berriak Europako Batzordearen ziurtagiria du, eta baita Sendagaien eta Osasun Produktuaren Espainiako Agentziaren fabrikazio- eta esportazio-lizentzia. Kalitate-estandarrak bermatzen dituen ISO 13485 ziurtagiria ere badauka.

Produktu berri honez gain, enpresak antigorputzak detektatzeko test serologiko bat merkaturatu zuen urte hasieran.