La Palmako sumendiaren erupzioa amaitutzat eman dute 85 egunen ostean
Kanarietako Sumendietako Arriskua Prebenitzeko Planak (Pevolca) La Palmako sumendi-erupzioa amaitu dela ziurtatu du larunbat honetan. Hala ere, larrialdi planak bere horretan jarraituko du.
Julio Perez Kanarietako Gobernuko Herri Administrazio, Justizia eta Segurtasuneko kontseilariak, operatiboaren arduradun eta Pevolcako zuzendariak, larunbat honetan iragarri duenez, La Palmako sumendiaren erupzioa amaitutzat eman du 85 egunen ostean.
Izan ere, zehaztu duenez, batzorde zientifikoak erupzioaren azken eguna abenduaren 13an ezarri du, tremor seinalea gelditu zenean.
Perezek «lasaitasunaz, poztasunaz eta itxaropenaz» hitz egin du, baina ohartarazi du larrialdiak bere horretan dirauela, eta, beraz, baita Pevolcaren aktibazioak ere. «Arriskua dagoen bitartean, Pevolca aktibo egongo da», esan du Perezek.
Astelehenetik aurrera, «segurua, ordenatua, mailaz mailakoa eta pixkanakakoa» izango den birkokatze-plana aztertzen hasiko dira, eta Perezek kalkulatu du lehen birkokatzeak urtarrileko lehen hamabostaldian hasi ahal izango direla. 7.000 pertsona izan ziren ebakuatuak.
Perezek iragarri duenez, hurrengo urratsak sumendiak suntsitutako zerbitzuak «berreraikitzea eta berregitea» izango dira.
Sumendiaren datuak
Isurketa bolkanikoak 1.219 hektarea hartzen ditu eta bi delta sortu dira, bata 43,46 hektareakoa erupzioaren hegoaldean eta bestea 5,05 hektareakoa iparraldean.
Erupzioak 1.576 eraikin suntsitu ditu katastroaren zenbaketaren arabera, eta 2.988 Copernicus satelite sistema europarraren kalkuluen arabera. Guztira 73,8 kilometro errepide kaltetu dira.
Laborantzako 370 hektarea erre ditu, gehienak platanondoak, baina baita mahastiak eta ahuakateak ere.