Hitzarmena negoziatzeko eskatu dute greban 900 egun daramatzaten Novaltiako langileek

Urtarrilaren 7an, ostiralean, 900 greba egun beteko dituzte Novaltiako langileek. 2019ko uztailean hasi zen «Europako grebarik luzeena» bihurtu dena. Zuzendaritzak uko egin diola negoziatzeari eta «greba eteteko ahal duen guztia egiten duela» salatu du ELA sindikatuak.

Novaltiako langileek 900 greba egun beteko dituzte urtarrilaren 7an, ostiralean, eta enpresako zuzendaritzari eskatu diote «jasaten duten prekarietateari amaiera emango dion» hitzarmena negoziatzeko.

Ohar batean, ELAk gogoratu du Novaltiako langileen greba 2019ko uztailean hasi zela eta «Europako grebarik luzeena» bihurtu dela. Sindikatuak salatu du zuzendaritzak «uko egin diola negoziatzeari» eta Lan Ikuskaritzak ere «uko egin dio enpresa jazartzeari eta zigor serioal jartzeari, grebalarien eskubideen aurka egindako etengabeko urraketei bizkar emanez».

ELAk azaldu duenez, Novaltia kooperatiba sozietate bat da, Bizkaiko 200 farmazia inguru dira sozietate horretako bazkideak, eta azken hiru urteetan 3,2 milioi euroko irabaziak izan ditu. Novaltiako zuzendaritzak, ordea, langileei 950 euro ordaintzen dizkiela salatu du sindikatuak, «hitzarmena bertan behera utzi baitzuen Zaragozan dagoen zuzendaritzak orain dela hiru urte».

Gainera, enpresak «greba eteteko ahal duen guztia egiten duela» gehitu du. Hala ere, ELAk esan du 2022an, «greban dauden pertsonek tinko jarraitzen dute borrokan eta, asteko egun guztietan mobilizatuz» eta zuzendaritzari eskatu diote «eser dadila jasaten duten prekarietateari amaiera emango dion hitzarmena negoziatzera».