Balentriak, historia gogorrak eta ikuskizuna nagusi izan dira Pekingo Jokoen lehen astean
Pekingo Neguko Olinpiar Jokoak hasi zirenetik astebete bete da ostiral honetan. Benetan ikusgarria izan zen inaugurazio ekitalditik honaino irudi ikusgarriak ikusi ahal izan dira Txinako hiriburuko zonalde hotzenetan, mendietan.
Pekingo Neguko Olinpiar Jokoek albiste ugari utzi dizkigute lehenengo astean. Euskaldunek marka onak egin dituzte eta atzerriko beste kirolari batzuek benetan historia bereziak ezagutzeko aukera eman digute.
Horietako bat, eta agian gogorrena, Queralt Castellet katalanak utzi digu. Snowboardeko kirolariak zilarrezko domina kolkoratu du, baina lorpen hori lortzeko egindako ibilbidea benetan azpimarratzekoa da.
2015an bere bikote eta entrenatzaile Ben Jollyren heriotzari aurre egin behar izan zion. Buruaz beste egin zuen buruan bi tumore diagnostikatu ostean. Gertaera hori gutxi ez balitz, tabla gainean jarraitzeko bere ametsa ia pikutara joan zen 2019an, Federazioaren aldetik laguntza ekonomikorik ez zuela jasotzen aitortu zuenean. Orain, zilarrezko domina batekin itzuliko da etxera.
Colby Stevensonen historia ez da atzean geratzen. 2016an izan zuen auto istripu baten ostean 30 haustura izan zituen kaskezurrean eta sendagileek zalantza handiak zituzten bizi normala egiteko gai izango ote zen. Sei urte beranduago zilarrezko domina lortu du "big air" modalitatean.
Bestalde, Irene Schouten patinatzaileak bi urrezko domina irabazi ditu izotz-gaineko abiadura patinajean –5.000 metroko lasterketan eta 3.000 metrokoan–, bigarrengoan gainera marka olinpikoa hautsiz.
Duela hogei urteko errekorra apurtu du Schoutenek, denbora neurgailua 6:43.51 minututan geldiarazi ostean; hau da, duela bi hamarkada Salt Lake Cityn Claudia Pechsteinek ezarritako marka baino hiru segundo azkarrago izanda (6:46.91).
Shaun White aipatzeko beste kirolari horietako bat da. Estatubatuar beteranoak, zeinek bere izenean snowboard eta skateboardeko zenbait bideojoko dituen, agur esango dio Beijingen bere ibilbide luzeari. Ostiral honetan, halfpipe proban, laugarren izan da. Malkoen artean esan du agur: «Mila esker, snowboard. Nire bizitzako amodioa izan zara».
Euskaldunak
Euskaldunei dagokienez, Lucas Eguibar zen domina eskuratzeko hautagai nagusiena, baina zoritxarrez donostiarrak ezin izan zuen snowboardercrosseko finalerako txartela eskuratu. Finalerdietako seriean laugarren izan zen, eta ondoren, kontsolazio finalean, zazpigarren postua lortu zuen, bere ibilbideko bigarren diploma lortuta.
Imanol Rojo eskiatzaile tolosarrak, berriz, bi lasterketa egin ditu orain arte Beijingen. Lehenengoan, debutean, 30 kilometroko eskiatlon lasterketan egin zuen. Bertan, 21. postuan bukatu zuen eta Olinpiar Jokoetako bere marka ondu zuen. «Oso pozik» agertu zen eskiatzailea.
Bigarren proban, iraupen eskiatzaileak 39. postuan bukatu zuen estilo klasikoko 15 kilometroko lasterketa. Inoiz Estatu espainoleko kirolari batek modalitate honetan lorturiko marka onena da. Hilaren 19an bere espezialitate den 50 kilometrokoan lehiatuko da Rojo.
Manex Salsamendi Silva nafarra, Brasilgo selekzioarekin lehian, 90. postuan amaitu zuen 15 kilometroko lasterketa. 19 urterekin, bere lehenengo Jokoak dira.
Bestalde, Adur Etxezarreta nafarrak maila bikaina erakutsi zuen eski alpinoko jaitsiera proban. Aresoko eskiatzaileak hamazazpigarren amaitu zuen, azkenean irabazle izan zen Beat Feuz suitzarrarengandik segundo eta 43 ehunenekora.
Ondoren, Aresoko eskiatzaileak ezin izan zuen aho zapore gozoarekin amaitu bere lehen Olinpiar Jokoetako parte-hartzea. Izan ere, super-erraldoia ezin izan zuen amaitu ibilbidetik irten zelako.